Ныр «Кредитон каникултæ» цæрджытæн сæ уавæрмæ гæсгæ райсæн ис иудадзыг æгъдауæй. Сæрмагонд закъон бафыста Владимир Путин. Документ фæзынд барадон информацийы официалон порталы. «Кредитон каникултæ» фæзындысты 2020-æм азы. Уæд сæ лæвæрдтой æххуысы хуызы пандемийы уавæрты. Фæстæдæр та, 2022-æм азы 8-æм мартъийæ 30-æм сентябрмæ сæ спайда кæнæн уыд санкициты тыххæй.
Ног фæтк йæ тыхы бацæудзæн фидæны азы 1-æм январæй. Афтæмæй, адæмæн фадат уыдзæн сæ алы кредиты фæдыл дæр 6 мæйы æмгъуыдмæ каникултæ исын. Уыимæ ма хъус æрдарын хъæуы æфстау ист æхцайы бæрцмæ. Хæдтулгæ самал кæнынæн æхца чи райста, уыцы кредит хъуамæ 1,6 млн сомæй фылдæр ма уа, иннæ кредиттæ та – 450 мин сомæй.
Уымæй уæлдай ма кредитон каникултæ райсæн уыдзæн, адæймаджы æфтиæгтæ дыууæ мæйы дӕргъы 30% къаддæр куы уой, уæд. Фиддонтæй рæстæгмæ хи суæгъд кæныны бар уыдзæн æфстауисӕгӕн йӕ цæрæнбынат æвирхъау уавæры фæткмæ куы бахауа, уыимæ ма йæ исбон куы фесафа, уæд. Бæллæхы тыххæй кредиторæн фехъусын кæнын хъæудзæн 60 боны дæргъы.
