«Культурæ», зæгъгæ национ проекты райрæзтыл профилон куыстуæтты разамонджытимæ дзырдта республикæйы хицауады сæрдар Тускъаты Таймураз. Цæгат Ирыстоны культурæйы министр Къубалты Эльбрус радзырдта ацы хъуыддаджы фæдыл куыстытæ куыд æххæстгонд цæуынц, уый тыххæй.
Куыд фæнысан кодта, афтæмæй уæлдай ргом аздæхтой культурæйы райрæзтмæ республикæйы районты. Заууатмæ чи æрцыд уыцы культурæйы хæдзæрттæ бындуронæй цалцæг кæнынц. Кæм нæ уыд, уым та сæ ногæй аразынц. Ацы аз сног кæндзысты Фарныхъæу, Мызур æмæ Нары культурæйы бынæттон хæдзæрттæ. Тускъаты Таймураз куыд фæнысан кодта, афтæмæй республикæй æнтыстджынæй архайы федералон программæйы. Æхцайы фæрæзтæй цух не `ййафы.
Культурæйы къабазы нæ фаг кæны фæлтæрджын кусджытæ. Æмбырды ма дзырдтой чиныгдонтæ цы уавæры сты уыдоныл дæр. Национ-наукон чиныгдоны директор Хайманты Иринæ куыд фæнысан кодта, афтæмæй чиныгдонтæ хъæуы рацаразын. Хъуамæ нырыккон домæнтæн дзуапп дæттой. Уымæй уæлдай ма архайой алыхуызон конкурсты. Иу ахæм æркасты руаджы Горæтгæрон районы чиныгдон рамбылдта грант-10 милуан сомы. Уый руаджы афæдзы кæронмæ чиныгдоны фæзындзæн ивдзинæдтæ. Сифтонг æй кæндзысты нырыккон домæнтæн дзуапп чи дæтты, ахæм кусæнгæрзтæй.
