Мæздæджы район зымæгмæ цæттæ кæны. Æппæт куыстытæ дæр æххæстгонд цæуынц фæткмæ гæсгæ. Уый тыххæй хъусын кæны Цæгат Ирыстоны цæрæнуæттæ-комуналон хæдзарады, артаг æмæ энергетикæйы министрады пресс-службæ.
Ног хъармгæнæн рæстæгмæ цæттæгæнæн куыстытæн радих кодтой 38 милуан сомы. Районы 286 бирæуæладзыгон хæдзарæй 65-ы дондзæуæн хæтæлтæ сног кодтой. Электрон тых æмæ газуадзæн системæйы цæттæдзинад дæр сбæрæг кодтой. Уымæй уæлдай ма хæдзæртты æддаг бакаст снывыл кодтой, ногæй баивдтой рудзгуытæ.
Профилон министрады куыд хъусын кæнынц, афтæмæй «Моздокские тепловые сети», зæгъгæ куыстуат фæнд кæны зымæгон рæстæгмæ 12 хъармгæнæны бацæттæ кæнын. Уæ зæрдыл уын æрлæууын кæндзыстæм республикæйы сæргълæууæджы уынаффæмæ гæсгæ цæрæнуæттæ комуналон хæдзарады объекттæ фæззыгон-зымæгон рæстæгмæ бацæттæ кæнын 15-æм сентябрмæ.
