Цæгат Ирыстоны курдиатджын фæсивæд – иу сценæйыл. Дзæуджыхъæуы райдыдта 22-æм республикон сфæлдыстадон æркаст «Студенческая весна», зæгъгæ. Архайджытæ сæхи фæлвæрдтой музыкалон къабазы. Æркаст цæудзæн æртæ боны. Фестивалы кæронбæттæны та сараздзысты гала-концерт. Уым архайдзысты уæлахиздзаутæ æмæ ма, зæрдæмæдзæугæ равдыстытæ чи бацæттæ кодта, уыдон. Фæсивæд сæ арæхстдзинад æвдисдзысты кафты. Хуыздæрты сбæрæг кæндзысты жюрийы уæнгтæ. Уыдон сты республикæйы культурæйы зындгонд кусджытæ. Æркасты хатдзæгтæм гæсгæ сбæрæг уыдзысты Цæгат Ирыстоны иугонд командæйы уæнгтæ. Уый нæ республикæйы кад дарддæр хъахъхъæндзæн Пермы.
Джиголаты Виктор, ЦИПУ-йы студент: «Аграрон университеты студент нæ дæн, фæлæ сын, мæнмæ гæсгæ, абон сценæйыл æмбал нæ уыд. Тынг аив кæфтытæ бацæттæ кодтой».
Суанты Валерий, РЦИ-Аланийы Мариинаг театры филиалы сæйраг балетмейстер: «Фыццаг хъуыдыйæ – хуымæтæджы æркаст. Фæлæ ахæм конкурсты равзæрынц аивады дæсныдæртæ. Ам цы артисттæ ахуыр кæнынц, уыдонæн сæ курдиат ахæм сценæйыл рабæрæг вæййы».
