Бынæттон администрацийы ӕмбырдты зал абон бæрнон адæмы не суазæг кодта, фӕлӕ сӕрмагонд æфсæддон операцийы архайæджы. Дзӕуджыхъӕу дæр æххæст кæны акци «Герой с нашего двора». Залы — горӕты разамынд, Хуссар ӕфсӕддон зылды, æфсæддон комиссариаты минæвæрттæ, ветерантӕ ӕмӕ дины кусджытӕ. Кад кæнынц Марат Захаровæн — 429-ӕм мотоæхсæн полчы ӕфсӕддонӕн. Президенты Указмӕ гӕсгӕ лæгдзинад, æхсар æмæ сгуыхтдзинæдты тыххæй хорзæхгонд æрцыд Георгийы Дзуары 4-æм къæпхæнæй.
Мæнæн тынг æхсызгон у ныртæккæ ам уæвын, ацы хæрзиуæг райсын. Æз æй фидарæй зонын ацы кады аккаг у сæрмагонд æфсæддон операцийы бынаты алы æфсæддон дæр.
Акци адарддӕр Марат Захаровӕн йӕ райгуырӕн 41-ӕм скъолайы. Ахуыргӕнджытӕ ӕмӕ ахуырдзаутӕ сӕхи бæстонæй бацӕттӕ кодтой. Кӕрты — кадджын линейкӕ, патриотон кафт ӕмӕ хæцæнгæрзты равдыст.
Уыимæ ма æрыгон æфсæддонты рæнхъытæм райстой æнæхъæн кълас. Фæсивæдæн æвдисӕндартӕ ӕмӕ нысантæ радтой кадджын уазджытӕ. Кӕронбӕттӕны ссардтой Уӕрӕсейы Хъӕбатыр Тыбылаты Мараты ном, уый дæр ацы скъолайы рауагъдон у. Сӕрмагонд æфсæддон операцийы архайджыты æрвылбоны цауты кой кодтой Лæгдзинады урокы. Сӕйрагдӕр та фæсивæд сгуыхтдзинады тыххæй базыдтой Георгийы Дзуары кавалерæй йæхицæй.
Нæ къорд куыста хæддзæугæ хæцæнгарзæй, мах артиллеристтæ стæм, райстам нысан, бынатмæ араст стæм, район бацахстам, мысантæ къуырын райдыдтам, нæ фистæгæфсæддонтæн æххуыс кодтам, куысты рæстæг скуынæг кодтам знаджы бынæттæ, сæ хæцæнгæрзтæ, æнæпилотон тæхæн аппараты пункттæ, нæ æфсæддонтæ уый фæрцы фæраздæр сты, сæ позицитæ ныффидар кодтой. Иууылдæр архайдтам иттæг хорз.
Сæрмагонд æфсæддон операцийы зонæмæ Марат Захаров ацыд зæрдæйы фæндонмæ гæсгæ. 2022-æм азы бафыста контракт. Дзуры, ныййарджытæ дзы сæрыстыр уыдысты.
Фыццаг архайдтой, цæмæй мæ хъуыды фæивон, цæмæй фæсчъылдымы баззайон, фæлæ æз мæхи фæстаг рæнхъыты нæ уынын, æз æрыгон дæн, бирæ тыхтæ мæм ис æмæ æз хъуамæ лæппутимæ, мæ хæстон æмбæлттимæ разæй архайон.
Скъолайы бацæттæ кодтой нырыккон уæрæсейаг хæцæнгæрзты равдыст. Цӕгат Ирыстон сси 19 регионӕй иу, акци «Герой с нашего двора» кæм æххæст кæнынц. Уый цӕуы Хуссары ӕфсӕддон зылды разамынды хъӕппӕрисӕй.
Ацы акцийы сæйраг нысан у нæ кæстæртæн, æвзонг гвардийы базонгæ кæнын нæ æфсæддонты сгуыхтдзинæдтимæ, цæмæй хъайтарты феной, хъæбатыртæ æрымысгæ не сты, ныртæккæ нæ алыварс сты, уадз æмæ йæ сывæллæттæ зоной, уыдондæр хуымæтæг лæппутæ кæй уыдысты æмæ партæты уæлхъус кæй бадтысты, уый.
Марат Захаровæн ацы бон ахсджиаг рауад, æрыздæхт йæ уарзон скъоламæ, ныр æй ам зонынц куыд æрмæст рауагъдон нæ, фæлæ Георгийы Дзуары кавалерæй дæр. Акци «Хъӕбатыр нӕ кӕртӕй» дарддæр æххæст кæнынц æгас бæстæйы. Алы регионы дæр ис йӕхи хъайтартӕ, йӕхи хъысмæттæ. Фӕлӕ сӕйрагдӕр — абон партӕты уæлхъус чи бады, уыдон бӕлвырд зонынц — дæнцæджы аккаг адӕмимæ фӕрсӕй-фӕрсмæ кæй цӕрынц, уый.
