Аивады æгæрон гæнæнтæ. Куыдзойты бинонтæ стырæй-чысылæй сæхи фæлварынц нывкæнынады. Цыппар сывæллонæй ииуылдæр равзæрстой нывгæнæджы фæндаг. Педагогтæ сын сæ курдиат уайтагъд раиртасынц, сæ куыстытæн сын стыр аргъ скæнынц. Æркастыты бацахсынц фыццаг бынæттæ. Сæ конд нывты бавæрынц сæ зæрдæйы хъарм, равдисынц сæ удысконд. Куыдзойты бинонты хыгъды ныридæгæн ис дæсгай куыстытæ. Суанг Аивæдты республикон лицейы равдыст дæр байгом кодтой.
Сырдтæ дæр симды бацыдысты Ацæйы фырты цагъдмæ. Уадындзмæ хъусгæйæ, Агуындæ-рæсугъд дæр йæ сæнтты Ацæмæзы цурмæ атæхы. Куыдзойты Альбинæ йæ хæдзармæ куыст кæны. Нарты кадджытæй цауы ныв цæттæ у. Чысыл ма йæм ахорæнтæ бафтаудзæн æрмæст. Фæлæ ма куыстмæ сæйраг критиктæ — йæ хотæ Элонæ æмæ Зæринæ дæр хъуамæ æркæсой.
Йæ хоты амынддзинæдтæм байхъусы Альбинæ кæддæриддæр. Чызджытæ ахуыр кæнынц Аивæдты республикон лицейы нывкæнынады хайады. Хистæр Элонæ та йæ каст фæци, ныртæккæ Цæгат Ирыстоны паддзахадон университеты аивæдты факультеты студенткæ у. Бинонты сфæлдыстадон фæндагыл фыццаг къахдзæфтæ дæр уый акодта.
— Æвæццæгæн, лицейы, цæттæгæнæн ахуырты рæстæг, ахуыргæнджытæ мæ курдиат хорзыл кæй банымадтой, уый тыххæй равзæрстой ацы фæндаг, фыццаджыдæр.
— Мæ хистæр хомæ кастæн æмæ сцымыдис дæн æз дæр. Райдыдтон ныв кæнын, мæхи фæлвæрдтон сабыргай.
Йæ хотæм чысыл Тимур дæр схæлæг. Цыппæрæмкъласон бауарзта æрдз æмæ цæрæгойты ныв кæнын. Йæ эскизты альбомы афтид фæрстæ бирæ нал ис. Аивæдты лицейы, йæ хотау, у иттæгдзау.
Æвзонг нывгæнджытæ бирæ æркастытæ æмæ фестивальты архайдтой. Се ‘хсæн æппæтадæмон равдыст Белоруссийы. Альбинæ дзы сси фыццæгæм къæпхæны лауреат.
— Гæздæнты авд æфсымæры сныв кодтон. “Хърихъуппыты” цыртдзæвæныл æнцайгæйæ, фæлæ æндæрхуызон. Уый фондз азы размæ уыд, цыппæрæм къласы уыдтæн.
Ацы куыст дæр ис бинонты сæрмагонд равдысты Аивæдты республикон лицейы. Байгом æй кодтой кадджын уавæры. Ахорæнтæ æмæ музыкæйы зæлтæй иумæйаг мелоди сарæзтой. Ахæм ахсджиаг мадзал лицейы фыццаг хатт ис. “Хъæздыг æмæ ирд куыстытæ, зæрдæ сæ райы”, — зæгъынц ахуыргæнджытæ.
— Алы сывæллоны курдиат дæр æндæр æмæ æндæр хуызты раргом вæййы. Æмæ уый, куыстытыл цæст ахæсгæйæ, бæрæг у. Суанг ма сын сæ стиль дæр раиртасæн ис. Уый тыххæй нæ бафæндыд ацы стыр равдыст саразын. Нывты тематикæ æмæ сюжеттæ алыхуызон сты, раст сæ нывгæнджыты миддунейау.
Куыдзойтæн сæ ныййарджыты дæр æрбахуыдтой. Анастасия æмæ Альберт сæ цоты алы хъæппæрисыл дæр баууæндынц. Æмæ абон сæрыстыр дæр уый тыххæй сты. Цыппар нывгæнæджы, сæ курдиат та сын райхæлдтой, схъæздыг кодтой педагогтæ. Бинонты кæстæр Артуры та фæнды музыкант суæвын.
— Æвæццæгæн, нæ кæстæр музыкант суыдзæн. Музыкæ уарзы. Æмæ цавæр? Классикон, оперæ. Фæндзыстæм, йæхи цы бафæнда, уый равзарæд.
Равдысты ис 50 куысты: портрет, натюрморт, пейзаж, гобелен, графикæ. Сæрыстыр у Аивæдты лицей Куыдзойты аивадон квартетæй.
