«Лучший в своей профессии» æркасты хатдзæгтæ ацы бонты скодтой Елхоты хъæуы. Хуыздæртæн æмбæлгæ хæрзиуджытæ саккаг кодта Цæгат Ирыстоны сæргълæууæг Битарты Вячеслав. Афтæмæй, Кировы районы 4 цæрæгæн саккаг кодтой «Сгуыхт кусæг»-ы ном. Уыдон сты хъæууон хæдзарад, культурæ, бынæттон хиуынаффæйад æмæ ахуырады къабæзты кусджытæ.
Кировы районæн социалон-экономикон райрæзты ацы аз бантыст бирæ. Зæгъæм, Дарг-Къохы сарæзтой 60 бассейны балер кæсаг дарынынæн. Уымæй уæлдай ма, кæронмæ амад цæуы, кæсагыл фыццаг хатт кæм бакусынц, ахæм комплексы объект. Байгом дзы уыдзæн 30 уæлæмхасæн кусæн бынаты. Ацы аз ма райдыдтой амайын 10 мин тоннæйæн дыргъдарæн бынат. Райдайдзæн кусын иннæ аз. Проект «Формирование современной городской среды»-йы фæлгæты 2018-2024 азты саив кодтой 4 æхсæнадон бынаты. Рæвдауæндæтты та рады хъуыддаг бынтондæр айстой.
