Луковская станицæйы амбулатори 80-æм азты амад у æмæ уæдæй ноггонд нæма уыд. Бындурон цалцæгмæ бавнæлдтой фарон. Ныр дзы бонмæ медицинон лæггад бакæнæн ис 100 адæймагæн. Хи лаборатори, прививкæгæнæн æмæ стоматологон кабинеттæ. Ныр цæрджыты дохтыры æххуысмæ дард цæуын нал хъæуы.
Луковская станицæйы цæрджытæ амбулаторийы байгоммæ тынг æнхъæлмæ кастысты. Бӕстыхайыл дæсгай азтæ цæуы æмæ йæ фыццаг хатт сног кодтой.
Ныр райдзаст цалцæггонд агъуыстыты ис нырыккон ифтонггæрзтæ. Медицинон æххуыс бакæнынæн æппæт уавæртæ. Анализтæ бæрæг кæнынæн дæр хицæн лаборатори. Дыккаг уæладзыджы — дæндæгты дохтыр. Ам дæр алцы техникæйы фæстаг домæнтæм гæсгæ.
Амбулатори лæггад кæны цалдæр мин адæймагæн. Уый тыххæй цæрджыты удæнцоймæ уæлдай хъусдард ис. Фӕлмӕн бадæн бынæттæ, уæрæх ацæуæнтæ. Цæмæй рæстæг дзæгъæлы ма хардз кæной, уый тыххæй та — электронон картотекæ. Республикæйы æнæниздзинад хъахъхъæнынады министр Тебиаты Сослан куыстыты хæрзхъæддзинадæй разыйӕ баззад.
Ацы аз ма бындуронæй сцалцæг кæндзысты Притенечное æмæ Виноградное хъæуты амбулаторитæ.
