Мæдæджы агурджыты къорд ссардта америкаг хæдтæхæг «Бостон А20»-ы састаг. Ныр специалистты, Стъараполы минæвæрттимæ иумæ, хъæудзæн биноныгæй бакусын. Сæрмагонд гарзы æххуысæй раиртасдзысты, хæдтæхæг кæм æрхауд, уыцы бынат. Ацы ахсджиаг мадзæлтты архайы бынттон админисьтраци дæр.
Февралы агурджыты къорд ссардта, Фыдыбæстæйы Стыр хæсты рæстæджытæй чи баззад, уыцы америкаг æфсæддон хæдтæхæджы сæстытæ. Дæсгай азты дæргъы уыд æмбæхст Терчы æрфыты. Архивон гæххæттытæм гæсгæ, хæдтæхæджы модель сбæрæг кодтой — Бостон А 20, зæгъгæ. Йæ дæргъ уыд 15 метрæй фылдæр.
Ныртæккæ зын зæгъæн у, хæдтæхæг бæлвырд кæм æрхауд, уый. Уымæ гæсгæ зæххы хайыл биноныгæй æмæ арæхстгай кусы техникæ. Архайд къуылымпы кæны, цæугæдоны æмвæзад æппынæдзух уæлдæр кæй схизы, уый.
Агурджытæм æххуысмæ æрцæудзысты Стъараполы крайы минæвæрттæ. Семæ æрласдзысты сæрмагонд кусæнгæрзтæ. Уыдон предмет доны бын йæ фæлгонцмæ гæсгæ ссарынц. Ссарын кæй хъæуы, ахæм æфсæддон хæдтæхджытæ æдæппæтæй Мæздæджы районы нырма фондз ис. Ацы хъуыддаджы агурджытæн æххуыс кæнынц бынæттон администрацийы минæвæрттæ дæр. Фæстæдæр фæнд кæнынц æфсæддон техникæйы равдыст саразын. Равдисдзысты дзы, цы хæдтæхджыты хæйттæ ссардтой, уыдон.
