Мæскуыйы дзырдтой Цæгат Кавказы регионты раззагдӕр проекттæ куыд æххæст кæнынц, ууыл. Æмбырд амыдта Уæрæсейы экономикон рæзты министры хæдивæг Сергей Назаров. Цæгат Ирыстоны 5 проектыл æрныхас кодта республикæйы хицауады сæрдар Дзанайты Барис. Бахардз сыл кæндзысты 64 млрд сомы.
Фæткъуыты дыргъдон «Казачий хутор»-æн рахай кодтой зæххы хай 771 гектары. Кæронмæ фæци дыргъæмбырдгæнæны арæзтад. Цæудзæн дзы 50 мин тоннæйы. Дарддæр аразынц агрохолдинг «Алания-молоко». Бынат ссардтой теплицӕты комплекс «Алания»-йӕн. Ныртæккæ кусынц йæ проектон-хыгъдон гæххæттытыл. Иннæ проект «Алания-парк».
Ныронг дзы сарæзтой фæндаггон æмæ инженерон инфраструктурæ. Уыдзæн дзы рæтæнвæндаг æмæ къахдзоныгътылбырæн трассæ. Уымæй уæлдай специалисттæ бакуыстой туристон-рекреацион комплекс «Къæхтысæр»-ыл. Цæгат Ирыстоны экономикон рæзтыл ма сахаддзысты валер кæсаджы куыст чи кæны, уыцы компани «Остров Аквакультура» æмæ Мамысоны курорт.
Транспортон-логистикон къабазы Дзæуджыхъæуы аэропорты арæзт цæуы ног аэровокзалон комплекс. Куыстытæ фæуыдзысты афæдзы кæронмæ. Æппæт проекттæ куы райсæм, уæд сын ис канд экономикон нæ, фæлæ ма социалон ахадындзинад. Куысты ног бынæттæ ратдзысты 7 мин адæймагæй фылдæрæн.
