Ирд курдиат, размæ хонæг тыхтæ, фæллоймæ уарзондзинад. Ацы æууæлтæ Магкоты Таймуразы кæнынц наукон сгуыхтдзинæдты фæндагыл. Æрæджы Цæгат Ирыстоны паддзахадон университеты цыппæрæм курсы аспирант сси æппæтуæрæсеон конкурсы уæлахиздзау. Æрыгон адæймаджы бакуыстад пайда у микробты æмæ бактериты ныхмæ буаргъдтæ уадзынæн. Фидæны æнтыстджын химикимæ фембæлд не сфæлдыстадон къорд.
Вазыгджын химион иугонд – фуран. Æнæхуыз тæнгъæд рог æхсызгон тæфимæ. Пайда дзы кæнынц пластикы, синтетикон тæгтæ æмæ фармацевтон кондады. Йæ бындурыл кæцыдæр хæйттæ æххуыс сты æвзæр низ дзæбæх кæнгæйæ, пайда сæ кæнынц ракы ныхмæ терапийы. Буаргъæд равзæры ххæууонхæдзарадон продукцийы хауæццæгтæй, зæгъæм æхсынæны, хъæдæрмæджы, хъæмпы æхсæдæнтæй. Буаргъæды æмархайды гæнæнтæ иртасы Магкоты Таймураз, ЦИПУ-йы æрыгон æмæ курдиатджын аспирант. Æрæджы сси Уæрæсйы наукон фонды конкурсы уæлахиздзау æмæ райста грант фурны синтез базонынæн.
Таймураз хими скъолайæ фæстæмæ уарзы. Бинонты хистæртæ дæр ахуыргæндтæ сты. Йæ фыд Магкоты Тамерлан сарæзта
катализатор, кæцы пайда у нефты продуктты æмæ пластикы утилизацийæн. Æрыгон специалисты бакуыстады фæрцы базонæн уыдзæн ног æмæ зын ссарæн элементтæ. Уыдонæй кæндзысты микробтæ æмæ бактериты ныхмæ буаргъдтæ. Фураны иртасынад парахат кæны, æххæстæй йæ базонынæн ахуыргæндты нырма рæстæг хъæуы, зæгъы Таймураз.
Таймуразы уæлахиз се ‘ппæтæн дæр æхсызгон уыд, разæнгард кæны ног æнтыстытæм. Фæсте аззадысты лабораторийы мæйгай куыстытæ. Ныр æрыгон адæймаджы размæ фæзынд ног гæнæнтæ. Гранты фæрцы самал кæндзæн нырыккон кусæнгæрзтæ, фæуæрæхдæр кæндзæн иртæстыты бæрц. Уæ зæрдыл уын æрлæууын кæндзыстæм, конкурсы æркастысты мин 700 курдиатæй фылдæрмæ бæстæйы 44 субъектæй. Уыдонæй разыйы дзуапп райстой 336 проекты.
