Майы Цæгат Ирыстонмæ æрбахæццæ уыдзысты 57 ног автобусы. Адих сæ кæндзысты муниципалон маршруттыл, се ‘хсæн лыггнинаг фарстатæ арæх кæм сæвзæры, уыдон – Беслæн æмæ Дыгуры район дæр.
Уый тыххæй журналисттæн радзырдта Цæгат Ирыстоны транспорт æмæ фæндаггон инфраструктурæйы комитеты сæрдар Солиты Тариэл. Ныхас ма цыд кадртæ кæй нæ фаг кæны, ууыл дæр. Фарстайыл архайдзысты республикæйы куыстдæттыны комитетимæ иумæ. Сæрмагонд программæйы ‘руаджы шофыртæн уыдзæн фадат дæсныйад уæлдæргæнæн курсытæ фæуынæн. Къуырисæры аппаратон æмбырды Сергей Меняйло бабар кодта автобустæ Дзæуджыхъæуæй аэропортмæ æрвитын райдайын. Солиты Тариэл куыд фæбæрæг кодта, афтæмæй уыцы балцвæдыл ис лыггæнинаг фарстатæ. Ныртæккæ терминалмæ адæмы æнæкъуылымпыйæ баласæн нæй. Фæлæ уыцы хъуыддагыл куыст ныридæгæн цæуы. Ныхас ма цыд фæндаггаг æнæрмæджы æхцайæ пайда кæнгæйæ фидыны фарстайыл. Æрдзырдтой ма хæдтулгæты салонты видеоцæстдарды тыххæй дæр. Уый ног системæмæ гæсгæ сараздзысты, æмæ афтæмæй бæлцæтты ласыны лæггæдтæ дæр фæхуыздæр уыдзысты.
