Нæ республикæйы цæрджытæ президенты æвзæрстыты тынг сæрæнæй сæхи равдыстой. Æмæ бæгуы цæуылнæ? Йæ аразджытæ бацархайдтой æмæ сарæзтой бæрæгбон. Æвзарæн хайадты хъуысыд зæрдæмæдзæугæ музыкæ, адæмæн кодтой лæвæрттæ. Нæ республикæйы æвзарæн къамисы æнæхъæн бон куыста пресс-центр. Дзыллон информацион фæрæзтæ дæр цырд фæлæууыдысты æмæ фыццаг хатдзæгтæ хъусын кодтой адæмæн. Ирыстоны цæрджытæ цы æнкъарæтимæ арвыстой æвзæрстыты бон, уый радзурдзæн нæ уацхæсджыты къорд.
Уæрæсейы президенты æвзæрстыты Цæгат Ирыстоны сæ хъæлæстæ радтой 400 мин адæймагæй фылдæр. Æдæппæтæй 89% проценты. Æппæтæй фылдæр адæм æвзарæн хайæдтæм æрбацыд Дзæуджыхъæуы рахизфарсы районы. Уый фæстæ цæуынц Кировы æмæ Алагиры районтæ. Æвзарæн къамис уый банымадта хорз бæрæггæнæныл. Цæгат Ирыстон ссис нæ бæстæйы 30 регионæй æвзæрстытыты ног технологитæй кæм пайда кодтой, уыдонæй иу. Æвзарæн хайадтæн се ппæты дæр уыд кандидатты æмæ æхсæнадон палатæйы минæвæрттæ, уыимæ ма фæсарæйнаг цæстдарджытæ дæр.
Æнæ къуылымпыдзинæдтæй дæр нæ рауад. Мæнг гæххæттытимæ барвыстой дыууæ кандидатæн баххуыс кæныны нысанимæ. Павел Грудинин æмæ Ксения Собчакы фарсхæцджыты æнæзакъон миты тыххæй æвзарон къамис бахъаст кодта Грудинины штабмæ. Уым аххос афтæ дæр сæхимæ нæ райстой, уаг чи фехæлдта уыдон та иуварсгонд æрцыдысты æвзæрстытæй.
Æмткъæй райсгæйæ æвзæрстыты бон бирæтæн уыд бæрæгбон. Æвзарæн хайадты цæрджыты хорз зæрдæйы уагæн хъуыст музыкæ. Хъæлæс раттынмæ адæм цыдысты æнæхъæн бинонтæй. Нæ республикæйы цæрджытæ уый банымадтой сæ граждайнаг хæсыл. Изæрдалынгты хицауады хæдзары цур арæзт æрцыд концерт. Концерт уыд Уæрæсе æмæ Хъырым куы баиу сты уый кадæн. Архайдтой дзы републикæйы артисттæ æмæ зарæггæнджытæ.
