“Мæ хорз кæстæр, дæ зæрдыл дар, нæ адæмы фидæн дæуæй аразгæ кæй у, йæ хъысмæт дæ къухты кæй ис”, – ахæм рæстаг ныхæстæй райдыдта æртæ фæлтæры фембæлд Ног Бæтæхъойыхъæуы. Кæстæртæм ныстуанимæ фæсидт Иры Стыр Ныхасы сæрдар Уататы Зелимхан дæр.
“Кæрæдзийæн аргъ чи кæны, уæздан æмæ рæстзæрдæ чи у, ахæм фæсивæд æрмæст куырыхон хистæрты цур хъомыл кæны”, – фæбæрæг кодта хъæуы хистæр фæлтæры минæвар Тараты Эльбрус. Хистæр кæстæрæн хъуамæ уа фæзминаг дæнцæг.
Фæсивæд хъуамæ фидар уой зондæй дæр æмæ хъаруйæ дæр. Патриотон хъомыладмæ фембæлды рӕстӕг уæлдай æргом аздæхтой. Æмæ ацы хъуыддаджы тохы быдырæй ссæуæг хæстонæй хуыздæр дæнцæг кæм ссардзынæ? Туаты Джамболат сæрмагонд æфсæддон операцийы бынатæй сæхимæ кæд цыбыр æмгъуыдмæ ссыд, уæддæр рæзгæ фæлтæримæ фембæлдæн йæ рæстæг нæ бавгъау кодта. Ног Бæтæхъойыхъæуы 3 мин цæрæджы йедтæмæ нæй. Сæрмагонд æфсæддон операцимæ ардыгæй ацыд 19 лæппуйы. Абон уыдоны ныййарджытæ дæр ам сты. Зæрдиаг саламимæ цы хуызистытæ сæрвитынц, уыдон стыр экраныл равдыстой.
Æнæмæнг, ацы кадртæ фæсивæдæн фесты сæрыстырдзинады хос. Уæвгæ, фембæлдмæ æрмæстдӕр хистæркъласонты æрбахуыдтой. Фæлæ кæстæр къласы ахуыргæнинæгтæ дæр сæхи зондæй бар ракуырдтой æмæ æрбацыдысты.
Фембæлды архайдтой фæсивæдон парламент æмæ Ветеранты советы минæвæрттæ. Мадзалы хатдзæгтæ зæрдæмæдзæугæ рауадысты. Алы кæстæр дæр фехъуыста, йæ адæм ыл стыр хæс кæй æвæрынц, æмæ сæ хъуамæ ма фæсайа, гадзрахатæй сыл ма рацæуа, ма бафæзма чъизи æмæ æгъдаухалæг æвзæрты.
