Фæсивæдæн дæр стыр бæрæгбонæй уæлдай нæу сæ алы ‘рбамбырд. Раздæры ансамблы зæлтæ бас, альт, дыууæ фæндырæй фæхъæздыгдæр кодтой, æмхъæлæсæй сæ рауад æнæхъæн оркестр. Йæ музыкантты нымæц та 50-мæ хæццæ кæны. Сæ иу — Гæбæраты Сæрмæт. Дала-фæндырыл цæгъдын 2 азы размæ базыдта ам, Ольгинскæйы культурæйы хæдзары.
Æмæ кæд фидæны аивадон дæсныйады нæ уыны лæппу йæхи, уæддæр оркестры архайд ныууадзынвæнд нæ кæны. Æххуыс мын цы уа, ‘ндæр хъыгдаргæ, бæлвырд, ницы кæны музыкæ, — зæгъы Сæрмæт.
Касаты Аланæ та студенткæ у. Фидæны ахуыргæнæг ма 6-æм къласы уыд, дала фæндырыл фыццаг цагъд куы акодта, уæд. Мæ фыдыфсымæр-иу балалайкæйыл куы цагъта, уæд-иу æм ахæм тынг хæлæг кодтон, — мысы чызг.
Сæ ахуыргæнæг та — Кæлуты Людмилæ. Ольгинскæйы культурæйы хæдзары кусы 1998-æм азæй. Уæдæй нырмæ схъомыл кодта фондз фæлтæры дала-фæндырдзæгъдджытæ. Ногæй чи ‘рбацæуы, ахæмтæ ам æппынæдзух ис.
Аивад йæхæдæг æгæронæй чи уарзы, уый йын йæ рæсугъддзинад иннæтæн дæр ирдæй равдисы.
Уæвгæ, культурæйы хæдзары цард æнхъæвзы. Йæ алы агъуыст дæр сабийæ нæ зыны раст — сæдæгай сты.
Ольгинскæ – Ирон театры авдæн. Тотраты Бесæйы фарн дæлæмæ нæ уадзынц. Йæ ном цы адæмон театр хæссы, уым алы кары артисттæ дæр ис.
Оркестр “Иры зæлтæ” у æппæтуæрæсеон æркастыты æппынæдзухы хуыздæр. Музыканттæ конкурс “Душа баяна”-йы райстой дыккаг бынат, Железноводскæй та сластой сызгъæрин æмæ гран-при.
