Сергей Меняйло фембæлд Уæрæсейы транспорты министр Роман Старовойтимæ. Ныхас цыди курорт Цъæймæ бацæуæны рацарæзтыл, уыимæ ма нацпроект «Инфраструктура для жизни»-мæ гæсгæ æхсæнадон транспорт сног кæныныл.
Республикæйы сæргълæууæг куыд фæнысан кодта, афтæмæй транспортон лæггæдты хæрзхъæддзинад фæбæрзонддæр кæнын æмæ бæлццæттæн æнцон уавæртæ саразын сты раззагдæр хæстæ. Уымæй уæлдай ма ныхас цыд Ирыстоны авиакомпаниты программæтæ апарахат кæныныл æмæ аэропорты райрæзтыл, кæцыйы ныртæккæ цæуы бындурон цалцæг.
Æппæтадæмон терминалы хъомыс дыууæ хатты фæфылдæр уыдзæн — сахатмæ 80 адæймагæй 160-йы онг. Хицæнæй æрдзырдтой уадзæн пункт «Дæллаг Зæрæмæг»-ы рацарæзтыл. Ноггондæй дзы суткæмæ цæудзæн 2 мин 630 хæдтулгæйы онг. Ныртæккæ уыцы нымæц у æрмæст 300. Уыимæ ма бафтдзæн тæлмытыл дæр. Æдæппæтæй уыдзысты 18.
