Арфæйы ныхæстæ, дидинджыты бæстытæ æмæ æхсызгон ныхæстæ. Абон сæ аккаг сси Валерийы чызг Анжеликæ. Студенттæ йын йæ æнтыстдзинадыл иууылдæр цин кæнынц. Цæгат Ирыстоны педагогон колледжы директор сси профессионалон дæсныдзинады конкурс “Педагог года”-йы “Педагог наставник” номинацийы уæлахиздзау. Хуыздæрты æмрæнхъ æрлæууын ын куыд бантыст, зæгъгæ, йæ куы бафарстам, уæд дзуапп радта – мæ дæсныйадмæ уарзондзинады фæрцы.
Ахуыргæнæг уæвын нысан кæны æппынæдзух хиуыл кусын, фидарæй зæгъы Анжелика Вареница. Æнæрлæугæйæ хъæуы фæлтæрддзинад бæрзонддæр кæнын, ног зонындзинæдтæ исын. Уымæй аразгæ у специалистты цæттæдзинад. Профессионалон ерысты сылгоймаг йæхæдæг стæм хатт фæархайы, арæхдæр арвиты æрыгон ахуыргæнджыты. Ацы аз профессионалон дæсныдзинады æркасты фæзынд ног номинаци, нæ æрмæджы хъайтарæн бæзгæ “Педагог – наставник”, зæгъгæ. Конкурс арæзт уыд æртæ турæй. Уыцы рæстæгмæ равдисын хъуыд æппæт зонындзинæдтæ. Сесситæ, дæсныйадæвдисæг ахуыртæ, публикæйы цур раныхас – ахæм хуызы æвзæрстой хуыздæрты. Фæлæ ууыл хъуыддаг нæ фæцис, уæлахиздзау сбæрæг уыдзæн цыппæрæм туры.
Ныр цыппар азы Анжелика Вареница разамынд дæтты Цæгат Ирыстоны педагогон колледжæн. Кæд йæ куыст æнцон нæу, уæддæр æй уарзоныл нымайы. Ахуырады къабазæн радта йæ царды 24 азы. Анжелика Вареница каст фæцис Дзæуджыхъæуы педагогон училищæ. Æртыккаг курсы студенткæ уыд, æмæ афтæмæй кусын райдыдта ахуыргæнæгæй скъолайы. Хорз ма хъуыды кæны йæ дæсныйады фыццаг къахдзæфтæ кæнгæйæ йыл йæ фæлтæрдджын æмкусджытæ куыд узæлдысты, уый. Ныр къорд азты фæстæ йæхæдæг сси сæдæгай сывæллоны разамонæг. Сылгоймаг у республикæйы æрыгон педагогты ассоциацийы бындурæвæрджытæй иу.
Разæй цыппæрæм тур, сылгоймаг æм бæстонæй цæттæ кæны. Профессионалон дæсныдзинады конкурс “Педагог года” у æмвæзад уæлдæр кæнæн къæпхæн. Радзурын Куысты цы раззагдæр гæнæнтæй пайда кæнынц, цы фæлтæрддзинад сæм ис, уый тыххæй радзурын къухы бафтыд дæсгай курдиатджын ахуыргæнæгæн. Жюри уæлахиздзауты сбæрæг кодта 10 номинацийы. Хуыздæрты хуыздæр чи сси, уый та сбæрæг уыдзæн хæстæгдæр рæстæг.
