Ног ахуыры азы агъоммæ Паддзахадон автоинспекцийы кусджытæ кæнынц профилактикон куыст скъоладзаутæ æмæ сæ ныййарджытимæ. Инспектортæ сын сæ зæрдыл лæууын кæнынц, куыд ахсджиаг у фæндаггон фæткы домæнтæ æххæст кæнын.
Мадзæлттæ аразынц бирæфатерон хæдзæртты кæртыты, базарадон центрты, стæй горæты уынгты дæр. Акцийы архайджытæн сын дзурынц, фæндаджы сæрты раст куыд ахизын хъæуы, æхсæнадон транспорты хи куыд дарын хъæуы, скъоламæ цæугæйæ уæлæдарæсыл, кæнæ скъоладзауæн йæ хызыныл хъуамæ æнæмæнг кæй уа рухсздахæн нысæнттæ. Ахæм профилактикон мадзæлттæ арæзт цæуынц республикæйы районты се ‘ппæты дæр. Хъуамæ ахæм куыст сывæллæттимæ кæной сæ ныййарджытæ дæр. Сæхи дардæй сын хъуамæ æвдисой фæндаггон æгъдæуттæ æххæст кæныны хъуыддаг.
Акцийы рæстæг инспектортæ ныхас кодтой шофыртимæ дæр. Цæмæй ма рох кæной æдасдзинады рæттæй пайда кæнын, сывæллæтты хæдтулгæйы ласой сæрмагонд бадæн бынæтты.
