Дæ чызг фыдбылызы бахауд, хъæуынц æхцайы фæрæзтæ. Цæстфæлдахджыты уыцы иухуызон архайд, фæлывд миты иу сценарий. Республикæйы цæрæг дыууæ сылгоймаджы систы цæстфæлдахджыты амæттæгтæ. Фыдгæнджытимæ дзурынц , уый дыууæйæ дæр нæ бамбæрстой. Сæ бинонтæн фæтæрсгæйæ, афæдзæй-афæдзмæ цы æхца фембырд кодтой, уыдон сайæгойты къухы бакодтой. Фæлæ цæстфæлдахджытæн сæ хъул сах нæ абадт.
Галинæ цы цауы бахауд, уый йæ хæстæгдæр рæстæг нæ ферох уыдзæн. Йæ тас нырмӕ дæр не ‘рцыд. Уыцы бон телефон куы систа, уæд хӕтӕлӕй фехъуыста сылгоймаджы тыхст хъæлæс, йæхи рахуыдта Галинæйы чызг. Кæугæйæ йын фехъусын кодта фæндаггон фыдбылызы кæй бахауд. Æмæ дарддæр мады катай. Сылгоймаг æй æмбаргæ дæр нæ бакодта, цæстфæлдахджытæ йæм æрбадзырдтой, уый.
Телефонæй ма уыцы иу рæстæг райхъуыст ноджы иу хъæлæс. Фарста æнæ пъæлицæйы архайдæй аиуварс кæнæн ис, зæгъгæ. Уый тыххæй та хъæуы æхца раттын. Йæхи нæ бацамыдта, уæдæ фæрæзтæ цæй фæдыл хъæуынц, уый дæр нæ загъта. Æрмæст æм хатыд æмæ йын æмабарын кодта, йæ чызджы кæй нæ фæахосджын кæндзысты, уый.
Ахæм цау ма æрцыд Тедеты Ларисæйыл дæр. Дыууæ сылгоймагмæ дзургæ дæр уыцы иу рæстæг фæкодтой. Фыдгæнджытæ ног цавæрдæр цæстфæлдахæн ми æрхъуыды кæнынæй сæхи нæ батыхсын кодтой. Дæ чызг бахауд тæссаг уавæры, æхца æри æмæ фыдбылызæй фервæздзæн, зæгъгæ.
Цæстфæлдахджытæ фылдæр хатт спайда кæнынц, адæймаг йæ бинонтæн кæй фæтæрсы, уымæй. Тас дзы бауадзынц, фæтæрсын æй кæнынц. Ахсджиаг вæййы телефонæй ныхас адæргъвæтин кæнын, цæмæй адæймаг фæдисы макæмæ уал адзура. Уый куы нæ рауайа, уæд цæстфæлдахджыты архайд дзæгъæлы фæуыдзæн. Раст зæгъæйæ, ацы хъуыддаджы сæрæндзинад канд закъонхалджытæ нæ равдисынц, фæлæ барадхъахъхъæнджытæ дæр. Æрбадзурæджы уайтагъд сбæлвырд кодтой. Цæстфæлдахæг разынд Дагестаны республикæйы 19-аздзыд цæрæг.
Æмæ кæд ацы хъуыддагæн йæ кæронбæттæн амондджын рауад æмæ закъонхалджыты ссардтой, æхцайы фæрæзтæ дæр раздахын къухы бафтыд, уæддæр ахæм хуызы цæстфæлдахæн митæ сарæх сты. Ис сæ хи æмæ хиуæтты бахъахъхъæнын. Афтæ зæгъынц специалисттæ. Уый фæдыл æппынæдзух кæнынц профилактикон куыст, уыимæ сидынц къæрцхъусдæр уæвынмæ.
