Дзанайты Барисы кандидатурæ Цæгат Ирыстоны хицауады сæрдары бынатмæ Парламенты Советы æмбырды банымадтой аккагыл. Йæ кандидатурæ раздæр бахаста республикæйы сæргълæууæг Сергей Меняйло. Райсом депутаттæ радон сессийы рахæсдзысты кæронбæттæн уынаффæ. Æдæппæтæй бæрнон куджытæ æркастысты 40 фарстамæ. Сæ иу – бирæсывæллонджын бинонты исбоны хъалон фæкъаддæр кæныны хъуыддаг.
Уымæй уæлдай депутаттæ сразы сты, йе ‘нæниздзинад цудыд кæмæн у, ахæм сывæллæттæ цы бинонты хъомыл кæнынц, уыдонæн ӕххуыс кæныны закъоныпроектимæ. Цыфӕнды карӕн сывæллоны ныййарджытæн ныр уыдзæн семæ стационарты лæвар уæвыны фадат. Нырмæ уыцы бар лæвæрд уыд 4 азы онг цы сывæллæттыл цæуы, уыдоны ныййарджытæн.
Дарддæр хæдзарон цæрæгойты хъысмæт. Куыдфæндыйы цæстæй сæм чи кæсы, уыдон ивар фиддзысты 3 мин сомы, бæрнон кусджытæ – 15 мин сомы, юридикон бæрнондзинад кæмæ ис, уыдоны та 30 мин сомы онг. Сырдау йæхи сырдтимæ чи дара, уыцы фыдмигæнджытæ та æфхæрд цæудзысты карздæр. Хицæн адæмы категоритæ сæ чыссæттæ раафтид кæндзысты 15 кæнæ 30 мины онг, юридикон бæрнондзинад чи хæссы, уыдон та 100 мин сомы онг.
