Парти «Иугонд Уæрæсе»-йы проект «Городская среда»-йы фæлгæты цалцæг кæнынц фæлладуадзæн бынæттæ æмæ кæртытæ. Объекттæ равзарынц цæрджыты курдиæттæм гæсгæ. Проекты руаджы алы кары адæм сæ рæстæг хъуамæ пайдаимæ æмæ хъæлдзæгæй æрвитой. Ныридæгæн ивынц асфальты уæлцъар, фæндæгты былтыл къæйдуртæ, æвæрынц ног рухсдæттæн системæтæ. Базилынц ма сабитæн хъазæн фæзтæм дæр. Ацы азы кæронмæ проекты фæлгæты Дзæуджыхъæуы базилдзысты 52 цæрæн хæдзары кæртмæ. Уыдоны `хсæн Доваторы номыл уынгыл бæстыхæйттæй иу. Ныридæгæн дзы куыстытæ кæронмæ æрхæццæ сты.
Доваторы номыл уынджы хæдзæрттæй иуы кæрты хæрзæрæджы дæр ма рæстæг пайдаимæ арвитынæн æмбæлгæ уавæртæ нæ уыд. Ныр дзы фæзынд сывæллæттæн хъазæн фæз. Сабитæн дзы ис алыхуызон турниктæ æмæ херыгæнæнтæ. Фæз ифтонггонд у æдасдзинады домæнтæм гæсгæ. Æппынæдзух дзы сабитæ хъæлдзæгæй сæ рæстæг æрвитынц. Ахæм фадат сын кæй фæцис, уымæй тынг разы сты.
Уымæй уæлдай ма кæрты сарæзтой æппæт хъæугæ уавæртæ хистæр кары адæмæн дæр. Сæвæрдтой дзы бандæттæ, фæзуаты уæлцъар ногæй раивтой. Фæзынд дзы ног рухсдæттæн системæ дæр. Кæрты цæрджыты ныхæстæм гæсгæ, раздæр ацы бынат кæддæриддæр быронæй дзаг уыд. Уæд сфæнд кодтой сæ кæртмæ базилыны курдиат парти «Иугонд Уæрæсе»-йы минæвæрттæм бахæссын.
Кæртмæ базилыны фадат парти «Иугонд Уæрæсе»-йы фæцис проект «Городская среда», зæгъгæ, уый фæлгæты. Æркæсинаг бынæттæ равзарынц цæрджыты курдиæттæм гæсгæ. Ацы кæртыл архайгæйæ куыстытæ æххæст кодтой цæрджыты фæндтæ хынцгæйæ. Кæрты цы ирон хæдзар ис, уый æддаг бакаст дæр уыд базилинаг. Ныр ыл фæзынд аив æмæ ирд граффИти. Фарон уал проекты руаджы кæрты сæвæрдтой спортивон кусæнгæрзтæ. Ацы аз куыстытæ кæронмæ ахæццæ кодтой.
Ацы кæрты фæзынд 2 ног хиирхæфсæн æмæ фæлладуадзæн фæзы. Хæстæгдæр рæстæг та ма дзы сараздзысты футболæй хъазынæн бынат дæр. Æрмæст ма йыл сæвæрын хъæуы сæрмагонд уæлцъар. Уый руаджы-иу сабитæ дæр æнæниз цардыуагыл æнцондæрæй фæцалх уыдзысты.
Хуасдзауты Алинæ
