Уæрæсейы Пенсион фонд бæстонæй йе ‘ргом здахы уæрæсейæгтæ иу фондæй иннæмæ куыд хизынц, уыцы уавæрмæ. Адæмы бартæ хъахъхъæныны уæлæмхасæн мадзæлттæ цæттæ уыдзысты сентябры. Уый тыххæй «Коммерсантъ»-æн Уæрæсейы пенсион фонды разамынды сæрдар Антон Дроздов куыд фæнысан кодта, афтæмæй адæмимæ хъæуы хуыздæр кусын. Рагагъоммæ сын хъусын кæнын хъæуы пенсион фонды куыстимæ баст æрцæуинаг ивддзинæдтимæ.
Уыцы фарстайыл Центробанчы ныхас кодтой сæрмагонд æмбырды рæстæг. Уырдæм æрбахуыдтой æнæпаддзахадон пенсион фондты разамонджыты. Бар сын радтой сæхимæ райсын уæлæмхæст хæстæ, цæмæй рагацау хъусын кæной цæрджытæн, сæ инвестицион æфтиæгтæй цы сафдзысты, фондзазон æмгъуыды фæудæй раздæр курдиат куы бахæсой, уæд.
Антон Дроздовы ныхæстæм гæсгæ Уæрæсейы Пенсион фонд уыцы куыст кæны канд Центробанкимæ нæ, фæлæ ма Генпрокуратурæимæ. Цæстдарæн кусæндонимæ æмгуыстады фæрцы адæмы бартæ хуыздæр хъахъхъæд цæуынц.
