Уæрæсейы Пенсион фонды цæгатирыстойнаг хайад фæдзæхсы мадæлты капитал райсæн кæмæн ис, уыдоны. Ныхас цæуы цæстфæлдахджытыл. Æхцайы фæрæзтæ расайынц алыхуызон гæды митæй спайда кæнгæйæ.
Æххуыс бакæныны монцæй горæты уынгты равæрынц сæрмагонд хъусынгæнинæгтæ æмæ информацион сыфтæ. Баныхасынц сæ æрлæууæн бынæтты, рекламон фæйнæджытыл æмæ æндæр объекттыл. Ахæм «хæрзгæнджытæ» уый фæстæ æхцайы фæрæзтæ раафтид кæнынц. Алы ахæм цауы тыххæй Пенсион фонд информаци арвиты барадхъахъхъæнджытæм. Слестгæнджытæ уый фæстæ саразынц сгарæн-агурæн мадзæлттæ.
УФ-йы Пенсион фонды цæгатирыстойнаг управленийы социалон фиддонты хайады разамонæг Бурнацты Фатимæ: «Мадæлты капиталæй спайда кæнынæн ис йæхи бæлвырд уагæвæрд. Æхцайы фæрæзтæй ис цæрынæн уавæртæ фæхуыздæр кæнын, сывæллæтты ахуырадæн бафидын, йе`нæниздзинад хъыгдæрд кæмæн у, уыцы сабиты дзæбæх кæнынæн, стæй мадæн йæ пенсион æвæрæнтæ хъæздыгдæр кæнынæн. Райсынмæ чи фæхъавы уыдонæн иу-хатт сæ зæрдыл æрлæууын кæнæм, сæрмагонд фæткмæ гæсгæ сæ кæй ис бахардз кæнын, уый».
