Зæрдæйы куыст раиртасын, буары сыгъд, цæф кæнæ стæджы саст куы ’рцæуы, уæд адæймагæн æмбæлгæ фыццаг медицинон аххуыс бакæнынмæ сарæхсын. Æппæт уыцы хъуыддæгты тыххæй дæсныйадæвдисæн ахуырты бæстон радзырдтой Дзæуджыхъæуы 7-æм скъолайы хистæр къласы ахуырдзаутæн.
Адæймагæн фыццаг æххуыс бакæнын. Раст æмæ цырд архайды руаджы йын йæ цард бахъахъхъæнын. «Навыки оказания первой помощи», зæгъгæ, практикон ахуыртæ ацыдысты хистæр къласы ахуырдзаутæ. Расидтысты сæ рагагъоммæйы профессионалон цæттæдзинады центры æмæ «Красный Крест»-ы специалисттæ. Сывæллæттæн бæстонæй радзырдтой центры куысты тыххæй.
Рагагъоммæйы профессионалон цæттæдзинады центры специалистты хъуыдымæ гæсгæ, фæсивæд сæ фидæны дæсныйады тыххæй æрмæст хъусгæ нæ, фæлæ ма дзы хи практикæйы хуызы дæр хъуамæ бафæлварой. Уый тыххæй центры саразынц алыхуызон иртæстытæ, ахæм хуызы базонынц сывæллæтты хъуыдытæ, сæ фæндтæ. Уый хынцгæйæ, снысан кæнынц дæсныйадæвдисæн ахуыртæ.
Дзæуджыхъæуы 7-æм скъолайы 9-10 кълæсты ахуырдзаутæн сарæзтой сæрмагонд ахуыртæ. Мадзалы сæйраг нысан — æрыгæттæн баххуыс кæнын сæ профессионалон фæндаг равзарынæн. Скъоладзаутимæ æрдзырдтой, адæймаг куы фæцæфтæ уа, йæ цонг куы фелвæса æмæ æндæр ахæм уавæрты куы бахауа, уæд хи куыд дарын хъæуы, уыдæттыл.
Мадзалы кæронбæттæны хистæр къласы ахуырдзаутæн фадат фæцис «Красный Крест»-ы минæвæрттимæ аныхас кæнынмæ, раттын фарстатæ. Бацархайдтой практикон ахуырты. Ахæм ахуыртæ, æнæмæнг, фæпайда уыдзысты. Уый та уый тыххæй, æмæ фæсивæдæн фидæны дæсныйад равзарын уыдзæн æнцондæр.
