Абон Цæгат Ирыстоны 9-æм хатт ныффыстой глобалон диктант ирон æвзагæй. Нæ телеканал «Осетия-Ирыстон»-æй æвдыста комкоммæ эфиры. Сæ зонындзинæдтæ ирон æвзагæй равдыстой скъоладзаутæ, ахуыргæнджытæ, студенттæ, стæй, кæй фæндыди, уыдон. Диктанты текст ныффыста Цгъойты Хазби «Ирон æвзаг – нæ фидæн», зæгъгæ. Æдæппæттæй тексты уыд 199 дзырды. Мадзал сарæзтой Ирон æвзаджы Боны кадæн.
Уæ зæрдыл уын æрлæууын кæндзыстæм, нæ республикæйы ахуырад æмæ наукæйы министрад телеканал «Осетия-Ирыстон»-ы æххуысæй Глобалон диктант комкоммæ эфиры равдыстой дыккаг хатт. Фарон диктант ныффыстой 3 мин адæймагмæ ’ввахс. Акци аразджыты хъуыдымæ гæсгæ, афæдзæй-афæдзмæ архайджыты нымæц рæзы.
