Рахизфарсы районы ацы аз цыма уарынтæ барæй нæ уыд, дзуры Санаты Вадим. Æнтæф бонты аххосæй французаг мыггаджы нартхоры тыллæг иууылдæр фесæфт – 370 гектары фæзуатыл. “Энермакс”, зæгъгæ, у фæразон бæрзонд температурæтæм. Фæлæ Рахизфарсы районы тæвд боныхъæдæн уый дæр нæ бафæрæзта. Быдыртæм донуадзæн системæ фермермæ нæй. Уарынты бæрц иу сæ тыллæгæн фаг уыд. Фæлæ ныр нымайынц сæ хæрдзтæ.
Тыллæг æрæмбырд кæнын нæ бантысдзæн Исахъты Викторæн дæр. Хъæууон-хæдзарадон куыстуат “Слава”-йы разамонæг куыд зæгъы, афтæмæй ахæм тæвд сæрд рагæй нæ хъуыды кæны. Нартхоры хæрзхъæддзинад иу æппынæдзух уыд тынг бæрзонд æмвæзадыл. Æмæ ацы аз дæр хъуамæ афтæ уыдаид. Фæлæ нартхоры тыллæджы бæсты – хус быдыртæ.
Куыстуат “АГРО-СОЮЗ” дæр фесæфта 20 милуан сомæй фылдæр. 600 гектары дзы сты цалдæр фермеры бæрны. Генералон директор Хæмæтхъуаты Руслан куыд зæгъы, афтæмæй сæ архайды иу рæдыд дæр нæ уыд. Хъуамæ æрæмбырд кодтаиккой нартхоры дыууæ хуызы. Схæцыдысты иу æнæ къуылымпытæй. Фæлæ ацы сæрд афтæ нæ рауад. Æмæ канд тæвд боныхъæды аххос дæр нæу.
Æнтæф бонтæ быдыры районты радыдтой июны астæу. Алы бон дæ иу температурæ схызт 30 градусæй фылдæрмæ. Æмæ уый тыххæй мæр метры онг бынмæ басыгъд. Ныр аграрийтæ фæнд кæнынц сæ быдырты цы хус нартхор ис, уымæй силос саразын.
Мæр кæд бафсæддзæн донæй, уый нырма нæ зонынц. Ныртæккæ регион ис антициклоны бæрны. Ацы бонты йæ баивдзæн Сау денджызы сæрмæ циклон. Æмæ уæд уый йемæ æрбахæсдзæн рог сатæг. Уарынтæ дæр уыдзæн. Ранæй рæтты тæрккъæвдатæ дæр. Фæлæ цы нартхор басыгъд, уымæн ахæм боныхъæд нал баххуыс кæндзæн. Фермертæ сæ зæрдæ дарынц профилон министрады æххуысыл.
