Цæгат Ирыстоны дæрддзæф хъæуты цæрджыты сæйрæг фæндон сæххæст. Ныр хостæ агурæг дард цæуын нал хъæуы. Сæ ног уавæртæй адæм разы сты æви нæ? Афтекты куыст домæнтæн дзуапп дæтты? Уыцы æууæлтæ сбæрæг кæныны фæдыл Уæрæсейы æнæниздзинадмæ цæстдарды службæйы расидтысты сæрмагонд басгæрстытæ.
Уый, æппын къаддæр, дыууæ мин адæймаджы. Иууылдæр иу цыфæнды хуымæтæг хосы фæдыл дæр Алагирмæ араст сты. Дард æмæ æрæгмæ. Майрæмадагæн йæхи мидæг кæддæр афтек уыд. Фæлæ йæ аз иу хатт гом кодтой, иу хатт æхгæнгæ. Фарон октябры фидарæй хаст æрцыд уынаффæ – адæмы æнæ хостæй уадзæн нæй. Хъæуы афтек хъуамæ æнæмæнг уа.
Сæ афтекæй разы сты Суададжы цæрджытæ дæр. Ам дæр хостæ балхæныны хъуыддагимæ зындзинæдтæ азгай уыд. Ныр уавæр цæхгæрмæ фæивта. Суанг ма сыхаг хъæутæй дæр ссæуынц ардæм. Хъæугæ хос куы нæ разыны, уæд йе ‘рласыны тыххæй курдиат ныууадзынц æмæ дыууæ бонмæ тæрхæджытыл фæзыны. Афтекы цур кусы сæрмагонд хæдтулгæ, ууыл препараттæ ласынц, се ‘нæниздзинадмæ гæсгæ ардæм сæ бон æрбацæуын кæмæн нæу, уыдонæн.
Ныртæккæ регионы фелсырон-акушерон пунктты æмæ амбулаториты фæндзай афтекæй фылдæр ис. Сæ алкæцыйы дæр æнæмæнг хъæугæ хостæ хъуамæ уа. Уымæ сæ хъус дарынц Уæрæсейы æнæниздзинадмæ цæстдарды службæйы. Уымæй уæлдай кæсынц æргътæм дæр. Ахæм басгæрстытæ ныридæгæн ацыдысты цалдæр районы.
Дæрддзæф хъæуты фелсырон-акушерон пункттæ æмæ амбураториты афтектæ хъуамæ уа. Æнæмæнг хъæугæ хос самал кæнын та йæ бон уа алы адæймагæн дæр. Ахæм хæс регионы разамонæг Сергей Меняйло сæвæрдта фарон.
