Пульмонологон центр æмæ онкологон диспансеры рацарæзт, Дзæуджыхъæуы 2-æм арæндоны бындурон цалцæг, Мæздæджы арæндоны арæзтад. Уымæй уæлдай ма тарнизы стационар поселок Южныйы, Республикон клиникон рынчындоны 100 бынатимæ инфекцион корпусы, стæй Дачнæйы фелсырон-акушерон пункты арæзтад. Уыдон сты, республикæйы хицауады сæрдар Дзанайты Барис Уæрæсейы æнæниздзинад хъахъхъæныны министры хæдивджытæ Наталья Хорова æмæ Евгений Камкинимæ фембæлды рæстæг кæй фехъусын кодта, уыцы сæйрагдæр хæстæ. Ныр сын хъæуы æхцайы фæрæзтæ ссарыныл бакусын.
Ацы аз ма хъуамæ республикæйы фæзына 3 модулон фелсырон-акушерон пункты. Уæдæ реабилитацион, онкологон æмæ тугдадзинты низты хайæдтæ кæм ис, уыцы медицинон организацитæ дæр хъуамæ сифтонг кæной ног кусæнгæрзтæй.
Хъæудзæн ма сын сæ хæдтулгæтыл дæр бафтауын æмæ сын сæ куыст компьютерты бындурыл рацаразын. Республикæйы цæугæ медицинон комплекстæ куы фæзынид, уæд уый дæр, фембæлды архайджыты хъуыдымæ гæсгæ, æвзæр нæ уаид. Хорз æххуыс уаиккой дæрддзæф хъæуты цæрджытæн æххуыс кæнынæн.
Уæвгæ та, Дзанайты Барис куыд загъта, афтæмæй ацы аз республикæйы медицинон къабазы рацарæзтæн хъæуы 1 миллиард æмæ 200 милуан сомы. Бахардз сæ кæндзысты 7 объекты арæзтадыл. Уыдоны `хсæн сты Тагъд æххуысы станцæйы дæлхайады арæзтад, стæй Беслæны поликлиникæйы цалцæг. Бæрнон кусджытæ ма дзырдтой 2024-æм æмæ дарддæры азты хæстыл дæр.
