Республикæйы йæ тæмæны ис фæсивæдон-дзæбæхгæнæн кампани. Медицинон, æфсæддон цæттæдзинад, хъæзтытæ, лекцитæ æмæ бирæ æндæр цымыдисаг мадзæлттæ. Ахæм программæ бацæттæ кодтой лагерь “Хохаг”-ы. Фæсивæд сæхи куыд æнкъарынц, уый базонынмæ нæ уацхæсджытæ абалц кодтой Тæмискъмæ.
Сæрдыгон улæфæн бонтæ афтæ арвитын, æвæццæгæн, æмæ алкæй дæр бафæндид. 120 адæймаджы адих кодтой цалдæр къордыл. “Хохаг” лагеры сæйраг нысан — 18 боны арвитын пайдаимæ. Сæ фæллад уадзынæй уæлдай ам сабитæ бирӕ ногдзинӕдтӕ базонынц. Уый тыххæй сын сæрмагондæй бацæттæ кодтой егъау программæ.
Фæсивæд ахуыр кæнынц Ирыстон æмæ Уæрæсейы истори æмæ культурæ. Уæрæхдæр кæнынц сæ зонындзинæдтæ бæстæзонынады, туризм æмæ æндæр къабазты. Уымæй уæлдай ма, ахуыртæ цæуынц æфсæддон цæттæдзинадæй.
Сывæллæттæн арæзт цæуынц дæсныйадæвдисæн ахуыртæ, квесттæ æмæ экскурситæ. Ерыс кæнынц нæртон хъæзтытæ æмæ зонгæ кæнынц алы къабæзты фæлтæрдджын специалисттимæ. Уыдон фæсивæдæн кæсынц лекцитæ. Ахæм программæ сывæллæтты зæрдæмæ хъуамӕ куыд нæ фæцæуа?
Ахуыртæй уæгъд рæстæг — хъæзтытæ, волейбол, бадминтон, футбол. Ам та фæсивæд сарæзтой хъазт Цæгъдынц националон инструменттыл, зарынц æмæ кафынц.
Ноджы ма фæсивæды ахуыр кæнынц дронтæ æмбырд кæныныл. Наукон-техникон фæзты зонгæ кæнынц виртуалон дунеимæ. Æппæт лыстæгдзинæдтæ дæр уайтагъд бамбарынц. Лагерь арæзт цæуы æрвылаз. Архайджыты нымæц та фылдæрæй-фылдæр кæны.
