Цæгат Ирыстон баххуыс кæндзæн Запорожьейы облæсты Черниговы районæн, цæстдариуӕггады бӕрнмӕ гӕсгӕ. Хъæуы сæм фæкæсын, сæ социалон-экономикон къабаз сног кæнынмæ. Ууыл дзырдтой хицауады радон аппаратон æмбырды.
Сергей Меняйло бабар кодта профилон министрадæн бригадтæ бацæттæ кæнын, цæмæй районы цæрæнуатон-коммуналон хæдзарады системæ бацæттæ кæной фæззыгон-зымæгон рæстæгмæ. Æнæниздзинад хъахъхъæнынады министрадæн та республикæйы сæргълæууæг бабар кодта мобилон медицинон комплекс арвитын. Арæзтады министрад та хъуамæ ахуырадон уагдæттæм базилынмæ куыстытæ æххæстгæнджыты арвита. Бæстыхæйттæ хъуамæ сцæттæ уой 1-æм сентябрмæ. Черниговы районы скъолатæ æмæ библиотекæтæм арвитдзысты æппæт хъæугæ ахуырадон æмæ аивадон литературæ.
Дзырдтой ма æхсæнадон транспорт сног кæныны тыххæй дæр. Дзæуджыхъæу райсдзæн 32 ног автобусы. Уымæн 300 милуан сомæн субсидитæ радих кодтой. Автобустæ æрбахæццæ уыдзысты афӕдзы кæронмæ. Республикæ уæлæмхасæн фæрæзтæ райста федералон бюджетæй 1 миллиард сомы бæрц. Сергей Меняйло бабар кодта августы кæронмæ бæстыхæйттæ аразыны тыххæй контракттæ бафыссын.
