Абон æмæ райсом республикæйы цæрджытæн сæ бон уыдзæн Бакулевы номыл зæрдæйы низты центрæй дохтыртæм басгæрст ацæуын. Консультацитæм сæхи ныффыстой 100-йæ фылдæр адæймаджы. Бæлвырддæр нæ дарддæры æрмæджы.
Фыццаг пациенттæн саразынц ультразвукы руаджы иртæст. Специалист лæмбынæг æркæсы сывæллоны зæрдæйы уавæрмæ. УЗИ-йы хатдзæгтæм гæсгæ – бæстон консультаци. Ныхас фæкæнынц алы лыстæгдзинæдтыл, бакусынц терапийæйы фæткыл. Афтæ ныридæгæн æхсæз азы.
Бакулевы номыл зæрдæйы низтæ дзæбæхгæнæн хирургийæйы центры дохтыртæ Дзæуджыхъæумæ æрцæуынц афæдз дыууæ хатты. Аразынц лæвар консультацитæ. Бирæтæ фыццаг хатт не ‘рцыдысты.
Специалистты æрбахоны Цæгат Ирыстоны æнæниздзинад хъахъхъæнынады министрад. Дæсны дохтыртӕ æркастысты 130 сабимӕ. Се ‘ппæтмӕ дæр гуырдзӕй рахӕсгӕ зӕрдӕйы низтӕ, дадзинтӕ ӕмӕ тугдадзинты хъӕндзинӕдтӕ.
Мæскуыйаг специалисттӕ бынæттон дохтыртимæ фæиртасынц низы миниуджытæ. Кæронбæттæны сбæлвырд кæнынц терапийæ. Дарддæры æххуыс кæй бахъæуа, уыдон хирургты æркаст ӕмӕ диагностикæ ацæудзысты Мæскуыйы Бакулевы номыл центры.
