Дунейы бир бæстæтæ нæй зæрдæ æмæ дадзинты низтæй рынчынты нымæц Уæрæсейæ фылдæр кæм у. Пациент рынчындонмæ куы бахауы, уæд цавæр дзæбæхгæнæн мадзæлттæ æмæ дохтыртимæ сæмбæлы? Мах æй базыдтам. Зæгъæм, рынчыны æрбаластой зæрдæмæ тугифтонгады къуылымпыдзинæдтимæ. Фыццаг уал бахауы дзæбæхгæнæндоны исæнуатмæ. Ардæм фæндагыл тагъд æххуысы фелсыртæ æппæт бæрæггæнæнтæ дæр æрбалæвæрдтой дохтыртæм.
Уыцы æмгъуыд дохтыртæ хонынц “сызгъæрин сахат, зæгъгæ. Уымæн æмæ туджы хасты тых куы фехæлы, уæд операци фыццаг 60, кæнæ 90 минуты дæргъы хъæуы скæнын, кæннод зæрдæ, кæнæ йæ иу хай амæлдзæн. Операцион уат хъуамæ цæттæ уа. Ахæм уавæры уыд Александр Бабицкий. Нæлгоймаджы Мæздæгæй æрбаластой.
Æвæстиатæй бавнæлдтой, уымæн æмæ сæ фæлтæрддзинад бæрзонд у. Рентгенохирургийы операцион уаты стент сæвæрыны размæ æппæт дæр цæттæ вæййы. Рысты æнкъарынад æруромгæйæ, операци скæнынц. Иуварсæй кæсгæйæ, цыма дохтыртæ æнцон процедурæ аразынц. Нæдæр туг, нæдæр лыг: пациент фæрстатæ дæтты, суанг ма хъазæнныхæстæ дæр кæны. Афтæмæй, ныртæккæ йæ цард бахъахъхъæныныл цæуы куыст.
Фæсопераци пациенты реанимацимæ раивынц. Дохтырты зæрдæ йæ уавæрмæ куы нæ фехсайы, уæд æй палатæмæ раивынц. “Инфаркт арæхдæр вæййы æндæр низтæ дæр ма цы адæймагмæ ис, уыдонмæ”, — республикон клиникон рынчындоны зæрдæйы низты хайады разамонæг Апаты Тамилæ.
Куыддæр рыст кæнæ æнæхцон æнкъарæн фæзына риуыгуыдыры, зæгъæм, тыхулæфт, зæрдæйы ритмы хæлд — æвæстиатæй дохтыртæм фæсидын хъæуы, цас тагъддæр, уыййас хуыздæр. Уæвгæ, æрыгон адæймаг дæр инфарктæй хызт нæу. Йæ хуыздæр хос — æнæниз цардыуаг. Рæстæгæй рæстæгмæ хъæуы туджы биохими бæрæг кæнын, цæст дарын холестерины бæрц æмæ артериалон æлхъывдадмæ. Мæсты къаддæр, фæлæ иугæр истæуыл фæхъыг дæ, уæд де ‘нкъарæнтæ дæхимæ ма дар.
Хатгай стент æвæрын нæ бахъæуы. Операцийы размæ пациентæн коронарографи скæнынц. Ацы иртæст рентгенæй уæлдай нæу. Хъыгдард дадзинты нымæц бирæ куы разыны, уæд пациенты Цæгат Кавказы медицинон центрмæ арвитынц.
Ахæм у процедурæ. Кæй зæгъын æй хъæуы, лыстæгдзинæдтæ сæвзæры хицæн цауты рæстæг. Фæлæ дохтыртæ алы рынчыны уавæрмæ дæр хицæнæй кæсынц. Стæй радон хатт зæрдыл лæууын кæнынц æнæниздзинадмæ цæст дарын кæй хъæуы. Фылæр хатт адæм азгай сæ низты тыххæй нæ базонынц.
