Дзæуджыхъæуы Электроникæйы колледжы æмæ Цæгат Кавказы арæзтадон техикумы фæзынд æрмадзтæ. Ныр студенттæн фылдæр гæнæнтæ уыдзæн. Ахуыргæнгæйæ цы зонындзинæдтæ исой, уыдонæй сæ бон уыдзæн спайда кæнын ног æрмадзты. Афтæмæй, сæ фæлтрддзинад рæздзæн.
Цалдæр азы фæстæ ацы фæсивæд цыфæнды куыстуаты дæр аккаг бынат æрцахсдзысты. Компаниты компьютерон системæты куыстмæ йæ хъус цы администратор дары, æнæ уымæй иу архайд дæр нæ фæрæстмæ уыдзæн. Уымæ гæсгæ, ахуыры рæстæг ахсджиаг у алы хъуыддагмæ лæмбынæг кæсын. Дзæуджыхъæуы Электроникæйы колледжы канд IT- специалистты нæ цæттæ кæнынц. Ам ахуыр кæнынц, фидæны веб-дизайн æмæ уæлæфтуантæ саразыныл чи архайдзæн, уыдоны. Студенттæ ма базондзысты дизайн-макеттæ æмæ сайттæ аразын.
Ацы аз колледжы фæзынд ног здæхт – Бизнесæн програмон гæнæнтæ. Республикæйы у фыццаг. Ног ахуыры аз йæ фæнд кæнынц аккредитаци скæнын. Уæд дзы фæсивæдæн сæ бон уыдзæн фæлварæнтæ дæттын. Дарддæр та араздзысты регионалон чемпионаттæ. Уым-иу æппæтуæрæсеон ерысты бацархайынæн хуыздæр специалистты равзардзысты. Цæмæй æрмадзтæ хъæугæ кусæнгæрзтæй æххæстгонд æрцæуой, уый тыххæй бахъуыд 13 милуан сомæй фылдæр. Колледж рамбылдта грант «Æрыгон дæсныты» федералон проекты фæлгæты.
Цæгат Кавказы арæзтадон техникумы дæр фæзынд æртæ ног фæзуаты. Æххæссынц архитектурæ, арæзтад æмæ цалцæджы алы хуызтыл. Раздæр рохуаты цы бынæттæ уыдысты, уым абон «Worldskills Russia»-йы домæнтæн дзуапп чи дæтты, ахæм æрмадзтæ æрбынат кодтой. Студенттæн бынаты дæсныйадæвдисæн ахуыртæ дæр скодтой. Æрмадзтæ гом кæныны кадджын мадзалы бацархайдта республикæйы Ахуырад æмæ наукæйы министры хæдивæг Габеты Вадим.
Азæй-азмæ колледжтæ æмæ техникумтæ цы дæсны специалистты рауадзынц, уыдоны бæрц фылдæр кæны. Сæйрагдæр у – ахуыры рæстæг сын æнцонвадат уавæртæ саразын.
