Дзæуджыхъæуы уыд Цæгат Ирыстоны гом чемпионат компьютерты программæтæ аразынæй æмæ робототехникæйæ. Сарæзтой йæ Цæгат Ирыстоны региналон фонд «Кредо-знание»-йы æмæ Дзæуджыхъæуы разамынды институты хъæппæрисæй.
Куыд зонут, афтæмæй республикæйы æмæ иннæ регионты фæзындысты сæрмагонд центртæ. Сывæллæттæн дзы амонынц программæтæ аразын æмæ робототехникæ. Æргом сын кæнынц ацы куысты сусæгдзинæдтæ. Фидæны роботтæ нын къуылымпыйы хос уыдзысты, æви æххуыс? Уый тыххæй нæ дарддæры æрмæджы.
Робототехникæ Цæгат Ирыстоны парахат кæнын æрæджы райдыдта, фæлæ сын ссис уарзон. Аланты зæххыл ахæм чемпионат фыццаг хатт уыд. Уæрæсейы президенты хъуыдымæ гæсгæ, нæ бæстæйы цæрджытæ нымæцон технологитимæ хъуамæ хуыздæр архайой. Цæмæй разæнгарддæрæй архайой, уый тыххæй та паддзахад радих кодта гранттæ. Финансон æххуыс райста региналон фонд «Кредо-знание» дæр. Райдыдтой Дзæуджыхъæуы разамынды институтимæ æмгуыст кæнын. Дзæуыджыхъæуы æмæ иуæй-иу районты байгом кодтой сæрмагонд центртæ. Кæй зæгъын æй хъæуы, сæ фæрцы гæнæнтæ дзæвгар фæуæрæхдæр сты æмæ сæм фæзынд чемпионат саразыны хъуыды.
Дзæуджыхъæуы разамынды институты ректор Цопанаты Игорь: «Ацы олимпиадæ фыццаджы -фыццагдæр у. Сарæзтам æй президенты гранты фæрæзтæй, радтой сæ регионалон фонд «Кредо-знание»-йæн. Гранты сæйраг хъуыды та у, цæмæй сæм цы æхца ис, уыдон схардз кæной программæтæ аразыныл, роботехникæ æмæ информатикæйы центртæ байгом кæныныл».
Ерыстæ уыдысты гом æмæ дзы архайыны бар уыд 30 азы онг кæуыл цæуы, ахæм фæсивæдæн. Сæ арæхстдзинæдтæ æвдыстой программæтæ аразынæй æмæ робототехникæйæ. Уыдысты 2 хайæ арæзт: Фыццаг – фæлварæн. Уым æрыгæттæ æвдыстой цæттæдзинад. Дыккаг хайы та хъуамæ хъуамæ сæ куыст æххæстæй равдистаиккой. Ерысгæнджытæй алкæмæндæр æвæрдтой баллтæ. Программæтæ аразынæй чи ерыс кодта, уыцы фæсивæды та хъуыд интернеты хæслæвæрлтæ сæххæст кæнын. Робототехникæмæ сывæллæттæ цы роботты бацæттæ кодтой, уыдон дисы æфтыдтой. Сæ нæмттæ дæр цымыдисаг сты – «Робо-сумо», «Лабиринт», «Робоэкстрим» æмæ «Полоса препятствий»-йы.
Сæйраг тæрхонгæнæг Алексей Катец: «Чемпионаты ис архайджытæ къылымпытæ кæм баййафдзысты, ахæм хæслæвæрдтæ æмæ сæ хъуамæ сæххæст кæной. Ерысты рæстæг сæ бон у сæ бынæттæ баивын æмæ йыйн кæм æнцондæр у, уыцы ран сбадын. Сæйрагдæр у цæмæй сæ хæслæвæрд хорз сæххæст кæной, уыимæ æнæ ахуыргæнæджы æххуысæй».
Зæгъын хъæуы уый дæр æмæ чемпионаты домæнтæ цъысымы никæй баппæрстой. Ууыл дзурæг у, ерысты цал адæймаджы бацархадта, уыдоны нымæц – уыдысты 175 адæймаджы. Ссыдысты канд Цæгат Ирыстонæй нæ уыдысты, фæлæ ма Цæцæны республикæйæ дæр. Алчидæр сæ бацæттæ кодта æнахуыр робот. Тогъуызты Алыксандр сывæллæтты техникон сфæлдыстады центры 6 йеддæмæ нæма ахуыр кæны, фæлæ йæм ныридæгæн фæзынд бæллиц – æцæг робот саразын.
Ацы чемпионаты уæлахидзаутæн бар уыдзæн Цæгат Кавказы федералон зылды ерысты архайынæн. Ахæм мадзæлтты руаджы нæ фæсивæд дунейы хуыздæрты æмрæнхъ кæй æрлæудзысты, уый дызæрдыггаг нæу. Уый та нын фадат ратдзæн нымæцон технологиты кусæнгæзтимæ иу æвзагыл дзурын, уыимæ ма фидæны роботтимæ æмгуыст кæнынæн.
