Фæллойы министрады мобилон бригады фӕндагыл фыццаг — хæххон хъæу Быз. Ам цӕры 89-аздзыд Дудиаты Тамарӕ. Пенсиисӕг сылгоймагӕн йе ‘нӕниздзинад хъыгдард у. Фӕстаг азты йӕ къӕхтӕ риссынц. Тыхамӕлттӕй сысты, фæлæ цæуын йӕ бон нал у. Ныридӕгӕн æххуысагур цалдæр рынчындонмæ фæсидт.
Йӕ диагноз у полинейропати. Кӕд рынчын у, уӕддӕр ын инвалиды æвдисæндар нæй. Мобилон службӕ цӕттӕ у баххуыс кӕнынмӕ. Пенсиисæг æмæ йæ бинонтæн радзырдтой, хъуыддаг куыд сырæздзæн, уый тыххæй. Социалон фонды æмæ Алагиры районы социалон лæггæдты центры специалисттӕ, стæй психолог ӕмӕ юрист сылгоймагæн скæндзысты хъӕугӕ гæххæттытæ.
Иннӕ пункт — Уынал. Бригады уæнгтæ хъæуы цæрджытимæ фембæлдысты бынæттон администрацийы. Адæмы тыхсын кæнынц зӕххы хæйтты ӕмӕ уынгты рухсгæнæнтæ сæвæрыны фарстатӕ. Ӕппӕты ахсджиагдӕр фарста у культурæйы хæдзар. Ныртӕккӕ ӕхгӕд у. Цалцӕг кӕнын æй хъӕуы.
Мобилон бригад фæнысан кодта ӕппӕт курдиæттæ дӕр. Уыналы хъӕубӕстӕйы администрацийы сӕргълӕууӕг куыд загъта, афтӕмӕй ахӕм мадзӕлттӕ ам вæййынц ӕдзух. Сӕйрагдӕр та у, ӕцӕг пайда кӕй хӕссынц, уый.
Ноджы ма цӕрджытӕн сарӕзтой бӕрӕгбон, программӕ “Уæнгрог бирæцард”-мӕ гӕсгӕ. Ацӕргӕ адӕмы ӕмӕ инвалидты ахӕм мадзæлттæ иу кӕнынц. Æмæ сын ныр хорз традици систы. Мобилон бригадтӕ ис социалон лæггæдты æппæт центры дӕр. Ӕдӕппӕтӕй республикӕйы сты 12. Азӕй-азмӕ сæ куыст хуыздӕр кæны. Абон ӕххуыс кӕнынц 12 мин адӕймагӕн.
