РЦИ-Аланийы сæргълæууæг Сергей Меняйло бабар кодта хостæй æххæст кæныны фарстамæ цæст дарын

Абон ма аппаратон æмбырды ныхас цыд цæрджыты хостæй æххæст кæныны фарстайыл дæр. Сергей Меняйло бабар кодта æнæниздзинадхъахъхъæнынады министр Тебиаты Сосланæн, цæмæй льготон хостæ чи исы, уыцы адæмæн уавæр бамбарын кæна. Профилон разамонæджы ныхæстæм гæсгæ, афæдзы райдианæй хостæй æххæстгæнæг куыстуæттимæ бафыстой 170 контрактæй фылдæр. Хостæн сæ фылдæр ныридæгæн республикæмæ æрбаластой æмæ сæ цæрджытæн дæттынц. Регионалон льготæйы фæлгæты рецепттæм гæсгæ хостæ райстой 12 мин адæймаджы, федералонтæм гæсгæ – 5 мины. Рафыстой æмæ æххæстгонд æрцыдысты 50 мин рецепты Онкологи æмæ сæкæрнизы ныхмæ хостæ. Тебиаты Сослан куыд фæнысан кодта, афтæмæй уавæрмæ ис бæстон цæстдард. Дефицит дзы нæй. Раздæры информацимæ гæсгæ, сывæллæттæн нæ фаг кæны туджы сæкæры бæрц барæн системæтæ. Ныртæккæ сæ æлхæнынц æмæ сæ хæстæг рæстæг ратдзысты чысыл пациенттæн. Ахæм датчиктæй ацы аз сæххæст кодтой 274 сывæллоны, сæ иумæйаг аргъ у 4,5 милуан сомы. Фæрæзтæ сты федералон бюджетæй. Хостæй æххæст кæныны фарстаты фæдыл оперативон штабы æмбырд арæзт æрцæуы алы къуыри дæр.