Цæгат Ирыстоны сæргълæууæг Сергей Меняйло фембæлд республикæйы цæрджытимæ. Адæм регионы разамонæгмæ æрбацыдысты алыхуызон фарстатимæ. Сунжæйы дондзæуæн системæтæ нал бæззынц, Елхотты уынгты рухс нæй. Хъæуты нæй фистæгцæуджытæн къахвæндæгтæ.
Дзукъаты Дианæйы ныхæстæм гæсгæ Елхотты Ленины номыл уынджы рухсдæттæн системæ нæй. Цæджындзтæ дзы ис, электрон тыхдæттæг телтæ дæр, фæлæ дзы рухс никуы уыд. Сергей Меняйло бахæс кодта Кировы районы хицауæн республикæйы промышленносты министримæ хъуыддагыл бакусын. Æмæ хæстæгдæр рæстæг фарста иуварс кæнын.
Богъиты Алан дæр цæры Елхоты. Тыхсы хъæуы уынгтæй иуы фистæгцæуджытæн къахвæндаг нæй. Æппынæдзух дзы цæуы бирæ сабитæ, уымæ гæсгæ уавæр æдас нæу.
Уынджы фæндаг сцалцæг кодтой, фæлæ къахвæндагæн фæрæзтæ нæ рафаг. Хъæуы фæндаджы 2 километры снывыл кæнын. Сергей Меняйло фæсидт, цæмæй куыстытæ æмткæй æххæст кæной. Бирæвæрсыгæй сыл архайой. Асфальт ивгæйæ хъуамæ æнæмæнг цалцæггонд цæуа фæнагæн йæ алфасбылай дæр. Уый къухы куы не ‘фта, уæд та ссарын хъæуы уæлæмхасæн фæрæзтæ. Дыууæ къуырийы фæстæ снысан кæндзысты куыстытæ чи ххæст кæндзæн, уыцы компани. Дарддæр та райдайдзысты фæндагыл кусын.
Сунжæйы дондзæуæн системæтæ хъæуы баивын. Уый тыххæй Сергей Меняйлойæн радзырдта хъæуы цæрæг Гæбуты Нинæ. Хæтæлтæ заууатмæ æрцыдысты. Арæх атонынц. Иуæй иуы уынгты та дон æппындæр нæ вæййы. Цæрджытæ сæ курдиатимæ бацыдысты районы администрацимæ. Фарон сарæзтой æмбæлгæ проектон-хыгъдон гæххæттытæ.
Дондзæуæн системæ ивын райдайдзысты фидæн азы февралы. Баххæст сæ кæндзысты августмæ. Калоты Заремæ та сæргълæууæгмæ ссыд Мызурæй. Куыд зæгъы, поселоччы ис Фыдыбæстæйы Стыр Хæсты архайджытæн цыртдзæвæн. 40 азы дæргъы цалцæггонд никуы уыд.
Æппæт курдиæттæм дæр æргом аздахдызсты хæстæгдæр рæстæг. Фарстатыл куыд куыст цæудзæн, уымæ йæ цæст дардзæн Сергей Меняйло йæхæдæг.
