Сæрмагонд æфсæддон операцийы бынаты сараздзысты госпиталь цæгатирыстойнаг æфсæддонтæн. Уый тыххæй нæ республикæйы сæргълæууæг ныхас кодта Уæрæсейы хъахъхъæнынады министрады æфсæддон-медицинон организацийы минæвар Биазырты Алыксандр æмæ не ‘мзæххон æфсæддонтæн æххуысы иумæйаг гуманитарон центры сæргълæууæг Андиаты Сосланимæ фембæлды рæстæг.
Биазырты Алыксандр куыд фехъусын кодта, уымæ гæсгæ хæстæгдæр рæстæг сæрмагонд æфсæддон операцийы бынаты фæзындзæн госпиталь саразыны кусæг къорд. Хаудзысты йæм Цæгат Ирыстоны сæргълæууæг æмæ хицауады администрацийы кусджытæ, медиктæ æмæ æндæр хъæугæ специалисттæ. Уый фæстæ та снысан кæндзысты дохтырты æмæ медицинон хоты къорд. Дзæбæхгæнæндон скусдзæн мæйы фæстæ.
Нæ республикæйæ сæрмагонд æфсæддон операцийы чи архайы æмæ медицинон æххуыс кæй бахъæуа, уыдон дзы сæхи дзæбæх кæндзысты. Уымæй уæлдай ма æмбырды ныхас кодтой æфсады медицинон æххуыс фæхуыздæр кæныны иннæ фарстатыл дæр.
