Секеры скъолайæ ныртæккæ хъуысы æрмæст арæзтадон мигæнæнты уынæр. Бæстыхай 40 азӕй фылдӕр цалцæггонд нæ уыд. Йæ бындурон рацæрæзтæн Федералон бюджетæй радих кодтой 46 млн сомы бæрц. Аразджытӕ ивынц хæтæлтæ, телтӕ, æмбæрзынц бæстыхайы сæр, кълӕстӕм ӕмӕ хӕрӕндонмӕ ӕрбаласдзысты ног дзаума. Куыстытæ нысангонд æмгъуыдæй нæ иппæрд кæнынц.
Цалынмӕ ифтонггарз фӕндагыл ис, уӕдмӕ арӕзтады алы къахдзæфмæ дæр хъус дары районы сӕргълӕууӕг. Цалцæг уалдзæджы райдыдта, фæлæ уый тыххæй уроктæ къуылымпы кӕнын нӕ бауагътой. 90 бынӕттон лӕппу æмæ чызджы сыхаг Цыколамӕ ластой скъолайы автобусыл. Уым ӕнтыстджынæй ахицæн сæ ахуыры аз. Сæ уарзон скъоламæ куы ‘рбаздæхой, уæд сæм æнхъæлмæ кæсдзæн ногдзинад — арӕзтадон кълас.
Уæвгæ, хъӕууон скъолайæн хорз æнтыстытæ ис: ам бахъахъхъӕдтой 11 къласы, байгом кодтой нымæцон лаборатори, рауагъдонтӕ та алы аз дӕр ацӕуынц майдантимӕ. Ныртӕккӕ цалцæгæн йæ 70% бӕрц конд у. Дыккаг уӕладзыджы алцыдæр ног — телтӕй хъармгæнæнты онг. Фӕлӕ ӕнӕ къуылымпыйӕ уӕддӕр нæ рауад.
Кусджытæ ӕмӕ техникӕ — фаг. Объекты фæллой кæнынц бынӕттон аразджытæ дӕр. Скъолайы цалцæг къухы бафтыд паддзахадон программӕ “Ахуырады рӕзт” ӕмӕ национ проект “Фӕсивӕд ӕмӕ сывӕллӕттӕ”-йы фæлгæты. Ног партӕты уæлхъус Секеры ахуыргӕнинӕгтӕ сбаддзысты 1-æм сентябры.
