Республикæйы фæнддагон къабазы райрæзты фарстатыл Сергей Меняйло ныхас кодта фæндæгты управлени “Кавказ”-ы хицау Александр Лукашукимæ. Регионы разамонæг фæнысан кодта, Цæгат Ирыстоны фæндаггон транспортон системæйы райрæзт ахсджиаг нысан кæй у. Архайынц ыл æппæт æмвæзадыл хицауады уæнгтæ. Фембæлды рæстæг ма сæргълæууæг бафтыдта, æнтыстджынæй кæй рæзынц куыд федералон, афтæ республикон фæндаггон хызæгтæ дæр.
Дарддæр цæуы Дзæуджыхæуы иуварсты фæндаджы арæзтад. Уый руаджы горæты уынгтæ суæгъд уыдзысты уæзласæн хæдтулгæтæй. Объектæн егъау нысаниуæг кæй ис, уый фæнысан кодта Александр Лукашук дæр. Йæ ныхæстæм гæсгæ, ифтонггонд уыдзæн рухсдæттæн системæтæй, уыдзæн дзы сæрмагонд бырутæ дæр.
Уымæй уæлдай ма, специалисттæ Транскамы фæфылдæр кæндзысты тæлмытæ дыууæйæ цыппары онг. Фидæны аз та байгом кæндзысты Бехъан-Æрыдоны маршрут. Разамонæг ма куыд бафтыдта, афтæмæй сæрмагонд программæмæ гæсгæ 2025-æм азы онг сараздзысты 1,5 км стационарон электрон рухсдæттæн системæтæ, уыдзæн дзы фистæгцæуджытæн сфетофор сæрмагонд æрхæцæнимæ æмæ æндæр нырыккон гæнæнтæ.
