Республикæйы карантины сæхгæдтой 34 ахуырадон кусæндоны: 21 скъола æмæ сывæлæтты 13 рæвдауæндоны. Уый тыххæй аппаратон æмбырды рæстæг Сергей Меняйлойæн фехъусын кодта ахуырад æмæ наукæйы министр Алыбегты Эллæ. Организациты æрвылбон уавæр иртасынц фæлхасгæнджытæм цæстдарды управлени æмæ æнæниздзинад хъахъхъæнынады министрады специалисттæ.
Æхснырсæг æмæ гриппæй рынчынты нымæц фæкъаддæр цæрджыты æппæт категориты ‘хсæн дæр. Дзуапдæттæг ведомствойы разамонæг Тыбылты Аланы ныхæстæм гæсгæ, уый къухы бафтыд кæцыдæр скъолатæ афойнадыл дистанцион хуызы ахуыртæм кæй раивтой, уыйы руаджы. Æнæниздзинад хъахъхъæнынады министрады бæрæггæнæнтæм гæсгæ, ныртæккæ стационарты дзæбæх кæнынц 25 хистæры æмæ 56 сывæллоны.
Æмбырды ма ныхас цыд льготæты хуызы хостæй ифтонгадыл дæр. Афæдзы райдианæй рафыстой 3 мин 404 рецепты. Боныхъæды аххосæй Арвыкомы фæндаг у æхгæд уæзласæн хæдтулгæтæн. Арæныл сæмбырд транспорты 388 иуæджы, уыдонæй 255 сты сæрмагонд æрлæууæн бынæтты. Æрдзырдтой ма хицауады структурон ивддзинæдтыл дæр. Фæсивæды комитет баиу кæндзысты спорты министрадимæ. Ныр уыдзæн фæсивæдон политикæ æмæ спорты министрад. Сергей Меняйло бабар кодта, хæстæг рæстæг бакусын фæндаггонд картайыл.
