Регионы разамонæг Сергей Меняйло амыдта инвестициты Советы æмбырд. Архайдтой дзы министрадты, ведомствоты разамонджытæ, республикæйы муниципалон скондты сæргълæуджытæ æмæ республикæйы бизнес-æхсæнады минæвæрттæ.
Ныхас цыд медицинæ, агропромышленнон комплекс æмæ цæрæнуæтты коммуналон хæдзарады къабазы хуыздæр проекттыл. Зæгъæм, куыстуат «ПМК-ФАРМА» фæнд кæны Алагиры районы фармацевтон завод скæнын. Арæзтадæн зæххы хай ратдзысты Майрæмададжы кæрон. Проекты иумæйаг аргъ у 985,1 млн. сомы. Уымæй уæлдай цæттӕ у агрохолдинг «Алания-Молоко» куыстуаты проект. Йæ куыст кæндзæн Мæздæджы æмæ Рахизфарсы районты. Дыууæ фермæйы уыдзæн стурвосы 5 760 сæры. Агрохолдингы уыдзæн 300 ног куысты бынаты.
Инвестициты фæдыл Совет баххуыс кæндзæн кæсагдарыны хæдзарад «Горная Форель»-æн. Проект сæххæст кæндзысты Æрыдон районы. Валер кæсаг дзы хъомыл кæндзысты ног технологитæй пайда кæнгæйæ. Йæ кондад мæймæ хъуамæ уа валер кæсаджы 40 тоннæйы. Компанийы арæзтадыл бахардз кæндзысты 303 млн сомы. Советы уæнгтæ ма разыйæ баззадысты фидæны аква-комплексæй. Проекты æууæлтæм гæсгæ, объекты уыдзæн æрвылазон аква-центр, СПА-центр, ресторан, кафе æмæ бартæ.
