Æдасдзинадимæ баст 115 фæткхæлды афæдзы райдианæй нырмæ фæнысан кодтой артаг æмæ энергетикæйы объектты. Уый тыххæй фехъусын кодтой терроризмы ныхмæ къамисы æмбырды. Басгæрстыты хатдзæгтæм гæсгæ административон æгъдауæй æфхæрд æрцыдысты разамонджытæ.
Ахæмтæ дæр разынд, æмæ терроризмæй хъахъхъæнæн мадзæлттæ чи не ххæст кæны. Зæгъæм, РусГидройы объекты Зæрæмæджы гидроэлектростанцæйы, Уæрæсейы гварди басгæрстытæ расидт аст хатты. Фæлæ, фæткхæлдыдтæ иуварсгонд не ‘рцыдысты. Республикæйы сæргълæууæг Сергей Меняйло бабар кодта Зæрæмæджы ГЭС-ы разамынды фарста прокуратурæимæ иумæ аиуварс кæнын.
Æмбырды ма дзырдтой экстремизм æмæ терроризмы ныхмæ профилактикон мадзæлттыл. Ахуырад æмæ наукæйы министры хæстæ рæстæгмæ æххæстгæнæг Алыбегты Эллæйы ныхæстæм гæсгæ, афæдзы æрдæгмæ сарæзтой 250 акцийы. Архайдтой дзы 38 мин ахуырдзау æмæ студентæй фылдæр. Сергей Меняйло куыд бафиппайдта, афтæмæй кæд æмбæлгæ мадзæлттæ арæзт цæуынц алы къæпхæныл дæр, уæддæр фæсивæд бæстон хъахъхъæд не сты. Бакусын ма хъæуы æрыгон адæмæн хæцæнгарз дæттыны æмæ пайда кæнынæн бардæттæг фарстатыл.
