Сергей Меняйло Экономикæйы уæлдæр скъолайы ректор Никита Анисимовимæ æрдзырдта ахуырады къабазы иумæйаг проектты райрæзтыл. Æмбырды ма архайдтой ахуырад æмæ наукæйы министр Алыбегты Эллæ, Цæгат Ирыстоны паддзахадон университеты ректор Огъуаты Алан. ЦИПУ æмæ Экономикæйы уæлдæр скъола бафстой æмгуыстады бадзырд ахуырадон æмæ наукон архайды фæдыл. Документмæ гæсгæ дыууæ ахуыргæнæндоны бакусдзысты иумæйаг ахуырадон программæтыл, ЦИПУ-йы наукон-педагогон кусджытæ Экономикæйы уæлдæр скъолайы фылдæр кæндзысты сæ фæлтæрддзинад, студенттæ æмæ аспираттæ дзы цæудзысты стажировкæ. Ацы азæй ма “Экономика” æмæ “Инноватика” здæхтытæм гæсгæ курдиæттæ исын райдайдзысты «Управление цепями поставок в международном бизнесе», зæгъгæ, магистерон программæмæ ЦИПУ æмæ Экономикæйы уæлдæр скъолайы дывæр диплом райсгæйæ. Сергей Меняйло æмæ Никита Анисимов бæстонæй æркастысты æмгуыстады фарстатæм. Сергей Меняйло куыд фæнысан кодта, афтæмæй бæстæйы раззагдæр уæлдæр ахуыргæнæндонимæ бадзырд бафыссын Цæгат Ирыстоны уæлдæр ахуырады программæты хæрзхъæддзинад фæбæрззондæр кæнынæн хорз æххуыс у.
