Стъæлттæ æмæ бандæттæ зынаргъ хъæдæрмæгæй ныр 20 азæй фылдæр аразы куыстуат «Рокос». Йæ куысты фæткимæ базонгæ республикæйы сæргълæууæджы хæстæ рæстæгмæ æххæстгæнæг Сергей Меняйло. Бынаты æрныхас кодтой, хъæдæрмæджы куысты къабазы абон цы аиуварсгæнинаг фарстатæ ис, уыдоныл. Æрдзырдтой йæ дарддæры райрæзтыл дæр.
Куыстуат «Рокос»-ы ныр 27 азы дæргъы аразынц стъæлттæ æмæ бандæттæ. Æппæт дæр æвзаргæ хъæдæрмæгæй. Регионы разамонæг базонгæ кондад æмæ йæ хъомысимæ. Ам æрныхас кодтой нæ республикæйы хъæдæрмæджы куыстгæнæн къабазыл дæр. Сергей Меняйло фыццаджыдæр фæбæрæг кодта, алы куыстуаты дæр кæй хъæуы райрæзты программæйыл бакусын.
Ахæм программæ ис куыстуат «Рокос»-æн. Йæ фæлгæты фæнд кæнынц сæ кондад фæуæрæхдæр кæнын. Сæ куыст афæдзы афонтæй аразгæ куыд нæ уа æмæ иу ран ма лæууа. Архайынц хъæдæрмæг цæттæгæнæн мигæнæнтæ сног кæныныл дæр.
Къабазы сæйрагдæр райхалинаг фарста у, фæлтæрдджын кусджытæ дзы кæй нæ фаг кæны, уый. Фембæлды куыд фæнысан кодтой, афтæмæй нæ республикæйы ахæм специалисттæ 20 азы нæ цæттæ кæнынц. Æмæ ныры ахуырад та нырыккон домæнтæн дзуапп нæ дæтты. Уымæ гæсгæ ам сфæнд кодтой специалистты бынаты цæттæ кæнын.
Æрдзырдтой æххуысы мадзæлттыл дæр. Сергей Меняйло ма иу хатт фæсидт, цæмæй разæнгарддæрæй иумæйаг куыст кæной Уæрæсейы промышлненносты райрæзты фондимæ.
Æмбырды хатдзæгтæм гæсгæ, йæ архайджытæ баныхас кодтой Уæрæсейы промышлненносты райрæзты фондимæ æмæ экспортон центримæ фембæлд саразыныл. Уыимæ ма, рæхсджы сараздзысты кондадон-ахуырадон базæты фæндаггон картæ. Бацæттæ йæ кæндзысты къабазы минæвæртты хæстæгдæр фембæлдмæ.
Дзæдзойты Фатимæ
