Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло амыдта аппаратон æмбырд. Дзырдтой социалон ахсджиаг фарстатыл. Сæйрагдæртæй иу – коронавирусы инфекцийы профилактикæ. Уымæй уæлдай регионы разамонæг бабар кодта нуазыны донимæ къуылымпыдзинæдтæ аиуварс кæнын. Цæрджытæм хъуамæ хæццæ кæна сыгъдæг дон. Уый куы нæуа, уæд дзуапп æрдомдзысты бæрнон кусджытæй. Цæрынæн хъæугæ хойрæгтæ, уыимæ хосты æргътыл дæр хъæуы æрхæцын.
Экономикон рæзты министрадæн Сергей Меняйло бахæс кодта сæрмагонд бадзырдты уавæр сбæрæг кæнын. Хъæугæ хойрæгтæн сæ кæцыдæр хай Цæгат Ирыстоны уæй кæндзысты уыцы-иу аргъæй. Æргътыл цæмæй ма `фтауой, уый тыххæй сæрмагонд бадзырд республикæйы экономикон рæзты министрад бафыста æхсæз стыр дуканиимæ.
