Цæрæнуæтты иумæйаг паддзахадон реестрмæ æххæст æмæ раст бæрæггæнæнтæ баххæсын. Уый тыххæй кусæг фембæлды æрныхас кодта Сергей Меняйло Цæгат Ирыстоны Росреестры управленийы разамонæг Токаты Хъазыбегимæ.
Управлени бынæттон хиуынаффæйады оргæнтимæ имуæйагæй кусы бирæвæрсыг пъланыл, цæмæй реестрмæ хаст æрцæуа регионы хъæутæ æмæ горæтты ‘хсæн арæнты тыххæй информаци. Уыимæ ма, реестрмæ хауынц территориалон æмæ хъахъхъæд бынæттæ, культурон нысаниуæг кæмæн ис, уыцы бæстыхæйттæ, стæй хъæдтæ æмæ доны объекттæ. Ацы азы 6 мæймæ бантыст нысангонд бæрæггæнæнтæ баххæст кæнын. Муниципалон скондты арæнтæ реестры фæнысан кодтой æххæстæй. Хъæутæ æмæ горæтты тыххæй информаци бахастой 60 проценты бӕрц. Уæрæсейы регионты ‘хсæн уый нымад у бæрзонд бæрæггæнæныл. Профилон управленийы разамонæджы ныхæстæм гæгсæ, ныртæккæ фарста райхалинаг у, бирæ хъæуты генералон пълæнттæ нысангонд кæй не сты, уый тыххӕй.
Сергей Меняйло фæнысан кодта, фарстайыл кӕй æрныхас кæндзысты республикæйы хицауады. Уымæй уæлдай ма, регионы хицауад бюджеты бавæрдзæн хъæугæ фæрæзтæ, цæмæй, генпълантæ цы хъæуты нæй, уым сыл бакусой æмæ сæ сфидар кæной.
