Республикæйы сæргълæууæг Сергей Меняйло райста бузныджы фыстæджытæ реактивон-артиллерион дивизионы командæгæнæг, дæлбулкъон Валерий Каширинæй æмæ æфсæддон хайады командыгæнæг, булкъон Сергей Саладинæй. Æххæст кæнынц хæстон хæслæвæрдтæ Донецк æмæ Луганскы адæмон республикæты. Фыстæджыты куыд нысангонд цæуы, афтæмæй Цæгат Ирыстоны æфсæддонтæ сæ хæстон хæс реактивон дивизионы хыгъды стыр лæгдзинад æмæ кадимæ æххæст кæнынц.
Хицæнæй фæнысан кодтой хистæр лейтенант Станислав Давыдовы, кæстæр сержант Плиты Ацæмæзы, сержант Батыр Израовы. Æфсæддонтæ архайынц хъæбатыр æмæ ныфсджынæй. Сæ профессионалон архайды руаджы Уæрæсейы мотоæхсджытæ бахъахъхъæдтой ахсджиаг район. Станислав Давыдов украинаг æфсæддонты æхстыты рæстæг радиостанцæ райтыгъта. Йæ удыл нæ ауæрдгæйæ, дивизийы æмæ командæгæнæн пунктимæ бастдзинад банывыл кодта. Уыцы хъуыддаджы йæм экипаж дæр фæкаст. Плиты Ацæмæз та знаджы æхстыты рæтæг равдыста командæгæнæджы иттæг хорз миниуджытæ. Ныппырх кодтой знаджы дыууæ пункты æмæ дыууæ гаубицы. Батыр Израовы æфсæддонтæ та скуынæг кодтой знаджы дыууæ пулеметы, рæмудзæн æрмæджыты дыууæ скълады æмæ бронетехникæйы цалдæр иуæджы.
