Сбæрæг сты Цæгат Ирыстоны сæргълæууæджы æрвылазон премийы лауреаттæ. Се ‘нтыстджын архайды тыххæй сæргълæууæджы номæй æрвылазон преми райстой республикæйы дзыллон информацион фæрæзты 17 минæвары. Уыдонимæ нæ телекомпанийы кусджытæ.
Тематикон службæйы шеф-редактор Нæкуысаты Бэллæйы хуыздæрыл банымадтой «Кад æмæ намыс», зæгъгæ номинацийы. «Афæдзы темæ Уæрæсейы – ахуыргæнæг æмæ хъомылгæнæджы афæдз»-ы номинацийы Сæргълæууæджы преми райста Æлборты Алисæ. Конкурсы сæйраг нысан – дзыллон-информацион фæрæзты райрæзтæн æххуыс, публикациты ахадындзинад æмæ хæрзхъæддзинад фæбæрзонддæр кæнын, журанлистты сфæлдыстадон æмæ профессионалон хъомыс раргом кæнын.
Æмткæй райсгæйæ, конкурсы къамис æркаст 150 куыстæй фылдæрмæ. Сергей Меняйло журналисттæн арфæ ракодта Уæрæсейы мыхуыры боны фæдыл. Бузныг сын загъта, сæ ахсджиаг куыст æмæ регионы райрæзтмæ æвæрæн кæй хæссынц, уый фæдыл. Сæргълæууæг ма бахаста хъæппæрис фидæны аз конкурсмæ ивддзинæдтæ баххæсыны тыххӕй, цæмæй дзы дзыллон информацион æнæрегистрацигонд фæрæзты минæвæрттæ дæр архайой.
