Сергей Меняйлойы разамындæй уыд аппаратон æмбырд

Креативон индустриты скъола йæ куыст райдайдзæн ацы аз Республикон аивæдты лицейы. Ноджы ма иу байгом уыдзæн 2026-æм азы Тауаситы Сослæнбеджы номыл нывкæнынады скъолайы. Уый тыххæй аппаратон æмбырды рæстæг фехъусын кодта республикæйы культурæйы министры хæдивæг Рæмонаты Маринæ. Регионы разамонæг Сергей Меняйло куыд фæбæрæг кодта, афтæмæй Дзæуджыхъæуы ацæудзæн Цæгат Кавказы креативон индустриты форум. Дзуапдæттæг кусджытæн бабар кодта мадзал саразын бæрзонд æмвæзадыл. Скъолаты аттестаци куыд цæуы, уый тыххæй радзырдта ахуырад æмæ наукæйы министр Алыбегты Эллæ. Фæбæрæг кодта, нысангонд фæткæй кæй нæ иппæрд кæнынц мадзæлттæ. Ныхас ма цыд сæрдыгон дзæбæхгæнæн кампанийыл. Сæргълæууæг бабар кодта сывæллæтты фылдæр кæнын музейтæ, театртæ, спортивон галуантæм. Хицауады уæнгтæ ма æрдзырдтой амбрози куынæг кæныны куыстыл. Муниципалон скондты разамонджытæ æмæ Хъæууон хæдзарадмæ цæстдарды службæ зианхæссæг кæрдæгимæ тох кæнынмæ хъуамæ афойнадыл бавналой. Фылдæр хъаст кæнынц Дзæуджыхъæу, Рахизфарсы æмæ Мæздæджы районы цæрджытæ.